交易長跑 — 第二篇：學嘢，但唔係學點贏

上一篇講到，用Demo account試咗入門書嗰啲簡單策略，GG收場。

有人可能以為，下一步就係硬住頭皮用真錢入場。唔係㗎，Demo都輸緊，仲咁勇？常理都唔會咁做。

所以我繼續學，繼續睇書。

今次睇嘅書，我仲記得書名，係道氏理論。

可能你會覺得奇怪，玩CFD，多數走短線，點解會去睇道氏理論？係，就係因為我唔識，亂咁搵書睇。而家唔記得晒具體內容，印象係主要講趨勢，講市場嘅結構。

講返學習呢件事，其實搵相關嘅嘢學係好重要，唔係嘅話就好似我咁，效率唔高。不過我唔係話學咗唔相關嘅嘢就係浪費時間，學到嘅嘢，某一日可能會有用。例如我唔玩CFD喇，轉去做股票投資，道氏理論講趨勢同市場結構嗰啲概念，可能就會用得著。

同一時間，又係YouTube度學指標。由最基本嘅開始，均線、RSI、MACD、Bollinger Band，唔係淨係學點用，仲學埋背後嘅原理，點計算出嚟，咩市況下適用，點解會咁設計。學到一個程度，仲挑戰咗一目均衡表，睇完之後老實講，唔知點用，對於我嚟講太難，暫時放低。

學完一堆指標之後，自然就諗住組合一下，試吓「創造」個策略出嚟。但係發覺back test好難做，人手係度碌張圖，好易錯，好易miss，準確度係有問題。就係呢個時候，開始有咗寫EA嘅念頭。不過呢個故事遲啲再講。

除咗技術分析，睇書仲學到兩樣嘢，令我印象好深刻。

第一樣：輸咗10%，唔係贏返10%咁簡單

有本書講到一個數學問題。

1000蚊本金，輸咗10%，得返900蚊。要追返1000蚊，唔係贏10%，係要贏11.11%。輸咗20%得800蚊，要追返就要贏25%。輸咗30%，要贏返42.85%。輸得愈多，追返嘅難度係幾何級數咁增加，過咗某個點，基本上係好難追得返。

呢度要補充一點。有人可能諗，如果唔係用現有本金嘅百分比計risk，而係用返原來本金嘅標準去計手數同risk，咁輸少咗本金之後，每個trade嘅實際風險比例係大咗，追返固然快啲，但輸得更快嘅機會都同樣大咗。仲有另一個情況，就係為咗keep住原本嘅手數，但又想控制risk，就縮細咗個止損距離。問題係，止損位置係有邏輯嘅，例如本來係放喺swing low之後，有market structure支撐，一旦為咗就手數而縮細咗止損，個位置就失去咗原本嘅邏輯保護，變成一個隨機嘅位置，策略本身就已經破壞咗。

另一個出路係再課金，補返本金。但係諗吓，本身策略同執行有問題，唔係話補錢就可以修正到，搵唔到個問題就再入錢落去，好大機會係輸更多。

呢本書講呢樣嘢嘅時候，係強調唔好輸，重要過贏。

當時我覺得好反智，交易梗係想贏錢，講咩唔好輸？後來過咗好耐，先真正明白：令自己喺市場生存，係第一樣要做嘅事。生存唔到，唔駛諗賺錢。

第二樣：唔好輕易信人地公開講嘅嘢

另一本書提到，人地公開分享嘅嘢，背後都有動機，唔好盲目跟從，要先諗清楚對方點解咁講。

好簡單嘅例子：一個股評人不停唱好某隻股，係真係隻股咁好？定係佢入咗貨，想唱高個價，等人接貨？又或者係間公司做緊融資，俾錢佢唱好，令融資易啲做？

唔係話人地一定係錯，唔係話有動機就係壞。有時係你贏我輸，有時係雙贏。例如一個交易高手免費分享心得，目的係想引人流，然後開始賣課程，可以多啲潛在顧客。佢係有目的先分享，但係如果內容係真係有用，幫到人，咁就係雙贏，冇問題。

關鍵係，跟從之前，先諗清楚。

講到呢度，要利申一下。

正如上一篇講過，我寫呢系列文章同podcast，初心係分享自己交易長跑嘅經歷，希望減少各位嘅試錯時間。但我同時都想發展自媒體副業，最好有少少額外收入。自問未夠料賣課程，可能會做一啲Affiliate Marketing，即係share refer code，你用咗嘅話我會有reward之類。

講清楚，係因為覺得透明度好重要。你知我嘅動機，先可以自己判斷。

條路自己揀，輸左唔好喊。大家一齊跑落去。下次再見