天黑

 天已經黑，我聽到對面嘅小農舍傳嚟人聲同埋叮叮噹噹刷刷刷嘅聲響。農舍嘅燈光橙黃，係呢一片漆黑中唯一一點光。

但係我而家個肚好餓，而我呢度就有一個鐵飯兜放咗喺地。不過，我搵唔到位攝入去食啖冷飯。我行開少少企喺度等。佢哋終於食完散開，我聞到鐵飯兜裏面仲有啲肉香，我一步一步行近個鐵兜，食晒裏面嘅剩飯。食完仍然肚餓，仍然好凍。

我行過一條大約兩米闊嘅石屎路，跑到對面嘅小農舍，聞到一陣人類細路仔獨有嘅香氣，仲有兩個中年男人嘅體味。我聽到一陣一陣笑聲同埋談話聲，然後小農舍裏面響起手指彈撥弦線溫暖而美妙嘅聲音。聲音停止。我聽到有狗吠聲由好遠嘅地方傳到我耳中。天一片黑。

農舍裏面再傳嚟柔弱嘅叮叮噹噹聲，聲音無之前咁響亮清脆。每一下叮噹都帶住猶豫同埋好奇，喺度試探每一條弦線。

我企喺農舍木門外斷斷續續叫起嚟。裏面嘅叮噹聲停落嚟。三把聲音開始對話。我喉頭拉出一串微弱嘅長音。農舍裏面嘅燈光依然明亮，提醒我要堅定咁一直呼叫⋯⋯我要佢哋知道我嘅存在。

木門終於打開，一個中年男人企喺我前面四處張望，佢似乎見唔到我。我趁機飛快閃入石屋內，跑到木椅底下。木椅上面坐住一個細路女，大約七、八歲。佢見到我，放低佢手上拎住嘅木箱。木箱中間有一個圓圓嘅窿，幾條幼細嘅弦線由圓洞底部向上伸展，緊繃繃勾喺一條黑木條上。細路女耷低頭伸出佢隻小手摸吓我身上嘅黑毛。佢嗰把黑色長髮垂落嚟，髮尖差啲掂到冰凍嘅石地板。佢一雙圓碌碌、深啡色嘅眼睛望住我，細細聲同我打招呼。圓眼睛瞇起上嚟變成兩彎新月。屋內暖和，我跳起爬到細路女嘅大髀上。

我向細路女發出喵喵如同人類嬰孩嘅喊聲。然後開始喺佢嘅大髀上輕輕踩踏，我身體變得鬆軟，好自然發出咕嚕咕嚕嘅聲音。我終於可以安心瞓一陣。

細路女小心溫柔咁同我掃背。

我深深入睡。

突然，我感覺到自己嘅身體被移動，我立刻睜開雙眼跳落地。

細路女將我抱起，望住我，係咁同我解釋。我唔知道佢喺度講緊乜嘢，只係知道我唔需要驚，佢唔會傷害我。佢放低我，揹起一個黑色大袋。之前開門嗰個中年男人，又打開嗰道木門。出面嘅冷空氣吹入嚟，我打咗一個乞嗤。細路女跟住男人行出去。我唔理，即刻跑過去跟住佢離開小農舍。屋入面嘅男人一邊指住我一邊望住細路女，然後喺度笑。細路女笑住搖吓個頭，又烏低身，跟我眼望眼，安慰我。我唔理咁多，決意跟實佢走。

細路女同男人喺前面行，我尾隨唔肯走開。細路女抬起個頭望吓個天，好興奮咁叫停個男人，要佢都抬起個頭望吓天空。黑色嘅夜空中有好多小光點閃閃發亮。我一路行一路嗷嗚嗷嗚係咁叫。細路女擰轉頭望吓我，又繼續向前行。佢哋行到一個大鐵盒前面，鐵盒底部有四個黑色塑膠圈。細路女望吓我又望吓個男人，男人點頭微笑。細路女打開鐵盒嘅門，我直跳入去鐵盒內，細路女坐入嚟笑得好開心。佢將我放喺佢大髀上面，開始唱歌。而我竟然聽得明白：

一閃一閃小星星，一粒一粒亮晶晶，

高高掛於天空上，閃閃散佈似鑽石。

一閃一閃小星星，一粒一粒亮晶晶。

「爸爸，我要叫佢做天黑。」

初稿：2026年8月9號