千祈唔好學系列之一籃子蟹貨投資策略

千祈唔好學系列之一籃子蟹貨投資策略

前日，港股美股齊插，道指一晚跌千幾點，血流成河。

換著以前，我呢種自作聰明嘅人，第一時間會沽出蘋果（AAPL），然後急不及待轉入一啲跌到「殘」嘅科技類股份，博反彈，賺取即時回報。

由於性情急躁，每見有可觀利潤便急急套現；但萬一看見股價繼續跌，又唔捨得止蝕。久而久之，便形成咗一張「滿江紅」嘅成績表，長掛喺股票戶口入面，睇見都眼冤。

究竟問題出喺邊？我特此請教高人。誰知位高人眉頭一縐，劈頭一句：

「睇你好眉好貌，唔似咁蠢㗎？贏就贏粒糖，輸就輸間廠，典型散戶心態，同牛頭角順嫂冇乜分別，不過……………」

佢竟然將我與牛頭角順嫂類比？我仲以為佢知道說話過火，稍作收斂，誰知剛好相反。

「你連牛頭角順嫂亦不如。牛頭角順嫂尚且是投資初哥，對股票不熟；你Ｄ４５枉為股壇老手，竟犯上如此低級錯誤。你知唔知你在玩緊咩？係死亡遊戲。蘋果現金流穩定，服務業務毛利高到令人羨慕，派息每年增加，頻頻回購，仲要拆細。佢係屬於高質量防禦型核心資產，你點可以輕易放棄㗎？

投資界高手嘅換馬動機，係見到更好才會出手。你就唔係。等如你家中已有個好老婆，入得廚房，出得廳堂，把家務打理得整整有條，人又賢良淑德，節儉慳家，只係略為唔作刻意修飾，疏於打扮。你就嫌棄佢，看見外面嘅狐狸精向你拋眉眼，便打算拋棄糟糠。你以為佢貪你乜？貪你斯文靚仔，定係有個大肚腩方便佢墊腳呀？佢貪你啲錢咋，死傻仔！」

高人呢一棍，先至敲醒我。佢直指我呢種就係「一籃子蟹貨投資策略」，同玩死亡遊戲無異。

高人的說話雖然有點尖酸,甚至近乎過火,但每字每句皆出自肺腑,乃金石良言,我要好好珍惜「老婆」,與「狐狸精 」劃清界線,當佢透明.

後記

開呢個「千祈唔好學系列」的主要目的，是想透過自我檢討過往自己所犯嘅投資錯誤，用文字表達出嚟，令自己更加深刻，「知錯能改」,同時亦可讓讀者在不用親身試錯的情況下「知錯能避」。正所謂「君子成人之美」，對於消費自己成就他人,D45並不介意.