攰

自從八年前意識到肩頸拉得好緊之後，似乎咁多年黎都冇真正放鬆過，頂多都係短暫嘅舒緩。每幾個月，可能有一兩日喺張床上面攤得好舒服，終於感覺到被鋪柔軟嘅觸感，而唔係比身體拉住靈魂。朝早更甚，通常瞓醒嗰陣仲感到頸長肌、頭長肌釋放嘅乳酸未循環晒，意識就逼呢啲身體日常運作所需嘅 “essential workers” 開工。

相較之下，間唔中做完運動之後背闊肌、臀大肌、比目魚肌等都有酸痛，但係呢啲地方拉下筋就冇事。甚至好多時上瑜珈班，老師都話我身體柔軟度高，係肌力差少少。

一講到肌肉無力就進入一個怪圈：無力咪練囉，但係問題一部分正正就係一啲肌肉發唔到力，借落第啲地方到，搞到有感覺嘅地方本身已經係最勞損，越練嗰啲地方就越差。

然後又總有人行埋黎同我講：「我又冇覺得膊頭緊喎！」我有呀嘛。有頭髮邊個想做癩痢？又有朋友三日唔埋兩日就 send 啲解剖透視拉筋片過嚟 (通常都係 sell 人買課程)，sorry 完全冇用。

兜兜轉轉，細個唔想肥仔波咁明顯，所以慣咗駝背，去到依加有時都仲會。鬼唔知睡眠質素影響休息咩，但係呢排夜晚成日眼光光，唯一瞓得着嘅方法就係令自己更攰，攰到捱唔住咁昏睡。

之前自己住嘅時候，掛住可以攬住前度瞓着嘅日子。去到依加住咗宿舍一年有多，又懷念有自己地方，起碼可以買張靚床褥。喺街上面想返屋企沖涼瞓覺，一瞓低又發現瞓唔着。離開香港嗰陣身體嘅訊號係「要休息」，但係全職讀書嘅呢年半，好似反而到處飄泊，冇乜點休息過。讀書嗰陣想返工，返工嗰陣想讀書，到依加再讀書啦，又想穩穩定定朝九晚五。

細個想快啲大個。咁我又唔會想去返以前嘅，但係大個咗都係越行越攰，而我只係廿八歲。