從足球去領略人性101

年青時代，自己到今日回頭望，其實從來未有思考得太多。實在人到中年，年過40，近十幾年，先開始思考類似問題。

我已經好耐未上過Matters寫文，不過今朝好想寫，其實我只不過想寫足球，不過一開筆寫，就想嘗試側寫，結果又變成扮高深，要從人性講起。

我其實想講英格蘭超級聯賽球隊韋斯咸，今朝起身，打開體育新聞，發現韋斯咸又輸波，作客被列斯聯以2比1擊敗，戰果大概意料中事，我亦非韋斯咸球迷。BBC報導提到，球會近52年以來最差開季呀，已經幾多幾多場未贏過波呀，球迷又不滿示威呀，新教練上任四場都未能夠扭轉頹勢呀，如無改善大概會包尾降班呀，其實以上絕非我關心之列。熟人都知，我已經追捧另一倫敦球會車路士超過30年，韋斯咸就算要降班，你死你賤，我只會鼓掌贈慶。

不過，其實亦不過兩年前，韋斯咸球迷仍然處於普天同慶狀態，球會幾十年來第一次奪標，於歐洲第三級盃賽（European Conference League）封王，當時球隊教練叫Moyes，正正被英國甚至全球球迷譏笑為「Football Genius」（足球天才），因為當年曼聯傳奇領隊Sir Ferguson退休，親自欽點由Moyes繼任，點知未教完一季就被炒魷，而曼聯球迷可能到今日先明白，Moyes當年戰績其實ok，總比近兩季堂堂班霸，偏偏徘徊中下游好得多。

普世球迷都天下烏鴉一樣黑，兩年前韋斯咸即使難得捧盃，不過球迷依然嫌棄Moyes戰術老派，覺得自己心愛球隊貴為歐洲（第三級）冠軍啊，成績根本不止徘徊於英格蘭超級聯賽中遊啦，應該挑戰上游列強？結果，韋斯咸沒有續約，Moyes約滿離隊，然後回到在下游掙扎求存之愛華頓，然後愛華頓今日已經回到中游。

事實證明，球迷又好，人類又好，永遠貪得無厭，永遠不知感恩，永遠拒絕珍惜現狀，一個二個，正所謂「冇嗰樣，要嗰樣」；就等如絕大部份愛情故事，都離不開移情別戀，分手要生要死。

不過，凡事都有兩面，如果人類好容易滿足，好感恩好珍惜眼前所擁有，其實人類文明就會停滯不前，甚至不進則退。人類文明會不斷創新，不停突破（甚至發明AI去毀滅自己？），其實正正由於人性必然貪新忘舊，不肯安於現狀。

講完，人性好矛盾，我未有任何解決辦法，或者，根本，需要解決嗎？