陳師奶個仔同TQQQ有什麼關係？

陳師奶個仔同TQQQ有什麼關係？

前幾日同老陳茶聚，佢一坐低就面色凝重，眉頭深鎖，神情嚴肅到好似要同我講國家機密咁。

「喂，你知唔知而家美伊開戰呀？啲導彈飛來飛去，搞到個市震騰騰，點解你仲可以好似冇事發生咁，仲夠膽伺機入市TQQQ？」

我聽完，笑而不語，輕輕呷咗啖普洱，然後反問佢一條完全唔關事嘅問題：

「老陳，我問你呀，我屋企隔籬嗰個陳師奶，最近生咗個大肥仔，成八磅重，眼仔碌碌好得意，你知唔知呀？」

老陳即時呆咗，滿頭問號，眼神空洞得嚟帶點疑惑：「吓？邊個陳師奶呀？佢生仔關我咩事？」

「Exactly.」我話，「呢個就係我嘅答案。」

---

### 戰爭係不幸，但唔代表你嘅股票要陪葬

戰爭，冇人想。但坦白講，呢啲係國家大事，小市民擔心都冇用，唔通你同普大帝傾吓計？唔好講笑啦。

戰爭無疑會衝擊社會，甚至震散市場情緒，但唔代表每個行業都要陪葬。尤其係以科技股為核心嘅TQQQ，佢嘅成份股唔係軍火商，唔係油輪公司，而係NVIDIA、Apple、Microsoft呢類全球巨頭。佢哋嘅生意唔會因為中東有煙花而即刻停擺。講句難聽但現實嘅：戰爭摧毀咗某啲設施，戰後重建反而可能帶動需求，科技公司隨時係「另類受惠者」。

至於TQQQ裡面嘅非科技股，例如Costco、Pepsi呢類行業龍頭，戰事或者會短暫影響消費意欲，但呢啲大財團，生意穩過你屋企隻飯煲。你唔通覺得，中東打杖，香港人就唔再買可樂、唔再入貨倉掃廁紙？唔好玩啦。反而，戰爭帶嚟嘅混亂，可能成為佢哋低價併購對手嘅機會——即係「趁火打劫，但係合法嗰種」。

---

### 市場情緒：悲觀者拋出燙手山芋，樂觀者當係和牛

我哋買股票成日見到一個現象：一有壞消息，全場雞飛狗走，明明你隻股票冇做錯任何嘢，業績靚仔到冇朋友，都照樣被拖累下跌。

呢個時候，你就要諗起我同老陳嘅對話：

陳師奶生仔，關老陳咩事？

中東打仗，關TQQQ咩事？

如果隻股票嘅基本面冇變，純粹係因為「大圍氣氛」而跌，咁你就唔使驚，反而應該問自己：我夠唔夠膽趁低買多啲？

正如英國作家狄更斯喺《雙城記》開頭所講：

「這是最好的時代，這是最壞的時代。」

同一單新聞，悲觀者見到末日，樂觀者見到機會。

悲觀者拋出嘅燙手山芋，正正係樂觀主義者夢寐以求嘅筍貨。

所以，當老陳問我點解仲敢入市TQQQ，我嘅答案好簡單：

> 「因為我買嘅唔係新聞，我買嘅係企業。導彈唔會射落我隻股票度，但恐慌會。而恐慌，就係我嘅入市訊號。」

---

總結

1. 戰爭係大事，但唔係你隻股票嘅直接敵人。

2. 市場情緒經常過度反應，悲觀時反而要冷靜。

3. 只要基本面冇變，恐慌性下跌就係機會，唔係警鐘。

4. 陳師奶生仔，真係關老陳冇事。

下次你見到有人因為新聞而慌到想清倉，你可以請佢飲啖茶，然後溫柔地問佢一句：

「喂，你知唔知陳師奶最近生咗個大肥仔呀？」