名人專訪｜車婉婉兒子升小一「食全餐」 放棄Offer參加攪珠：好多人覺得我癲咗

小一升學對於小朋友及家長來說都是一個重大考驗，明星家長亦不能避免。藝人車婉婉的兒子BBQ今年迎來小一升學，考直資小學、派位、小一叩門全部都試過，才如願以償。她在專訪中憶述9個月「食全餐」升學歷程的甜酸苦辣，認為最重要是家長要有EQ同IQ去平衡小朋友的情緒，並且要始終抱有信念，相信上天會有最好的安排。

考直資小學一波三折

車婉婉及老公均屬意BBQ讀本地學校，希望從小培養兒子的中文讀寫能力。為此，她幫兒子報考5間直資小學，不過沒有刻意讓BBQ參加面試班。有朋友覺得她報考的學校數目太少，車婉婉反而認為，幸好沒有報考太多學校，否則自己又要返工、又要幫兒子準備入學試，難以負荷：「有啲（學校）咁遠，你唔會去讀，點解要報呢？」

在準備拍片面試的時候，車婉婉發揮演藝經驗，「導演上身」幫兒子準備，以為十拿九穩，誰知意外不斷——

首先，本應負責IT問題的老公及弟弟先後確診covid，她只能帶着BBQ到朋友屋企拍攝；然後，她驚覺小朋友拍片的壓力比想像中大：「有學校要求收到問題後一個鐘內上傳影片，答第1條問題我已經用咗30幾分鐘。朋友就同我講，唔得了，你睇睇演員？BBQ已經瞓咗喺沙發，將頭埋入咕臣度。」她笑言，拍片面試的過程令人變得暴躁，如果老公有參與，夫妻二人必定吵架。

拒絕Offer反令兒子受傷

經歷完打仗一般的入學試後，BBQ成功收到1份Offer，車婉婉卻迎來了壓力最大的一刻：住址所屬校網內有一間心儀的男校，應該接受Offer安全上岸，還是參加攪珠「搏一搏」？車婉婉說，自己翻來覆去猶豫了兩日，考慮到BBQ的性格更適合男校，最終決定拒絕offer，參加統一派位。

這個決定讓幼稚園老師及其他媽媽都大感驚訝，「老師眼睛睩大咗三倍，問我，點解你咁做？我冇聽過其他媽媽會咁做，你好勇敢。」說起這段經歷，車婉婉說：「你問我後不後悔turn down offer，我依家當然話唔後悔」，但這個決定對BBQ的影響出乎她的意料。

「大多數同學仔都知道自己下一步去邊，日日返學會傾，而BBQ俾同學仔問到嘅時候，佢係無答案，有少少hard feeling。佢有一日返屋企問我，自己小學會去邊度？同邊個一齊去？係咪無人要我呀？」

回想起當時的心情，車婉婉忍不住眼泛淚光：「我想喊，我唔識答佢，冇諗到呢件事會令佢好大反應。」作為一位正能量媽媽，當下她唯有打起精神，繼續鼓勵、安撫6歲的BBQ：「（同佢講）唔使擔心，我哋一定有地方去，遲啲就知道邊個陪你。」

遇上削減配額「好緊張」

統一派位結果未能如願，車婉婉只能最後的嘗試——叩門。她原本決定叩門4間小學，分別是2間男女校和2間男校，但其中一間男女校和最心儀的男校叩門時間有衝突，最終只叩門3間學校。經過第一輪面試後，BBQ收到2間男校的次輪面試通知。

從4間到2間，加上今年削減小一叩門學位，等待結果的過程讓車婉婉非常忐忑：「滴咗一大把汗，點解要喺仔仔（升小一）呢一年，我要強烈叩門嘅時候減配額呢？」最終，車婉婉先後收到2間男校的取錄通知，立即帶上註冊證去登記：「收電話嗰一刻，啲眼淚不自覺地湧晒出嚟，真係超級開心！」

「緊張多過辛苦」 秉持信念一路堅持

回想起這段「食全餐」經歷，車婉婉不覺得太辛苦，因為是自己的選擇；但有時候會比較緊張，例如學校面試家長時，她會擔心自己的表現影響學校取錄，亦會跟老公提前準備面試題目。

車婉婉認為，準備升小一的整個過程，家長要兼具EQ和IQ去平衡小朋友的情緒。例如，朋友建議用獎勵計劃安撫BBQ：「如果你做得好，個個阿姨都會買禮物，最後叩到呢間學校，BBQ收到8份禮物，覺得好開心。」

叩門前，車婉婉亦會與BBQ提前熟悉學校：「講多啲學校嘅嘢，例如邊個哥哥都係呢間學校畢業，上網站睇吓相，令佢對學校有啲熟悉。如果講幾千人爭一個位，細路會有好大壓力。」

車婉婉分享，自己能夠一路堅持下來，關鍵是「唔好甩咗信念」，一是對小朋友的信念，二是對上天安排的信念：「我祈禱嘅時候會講，如果是適合嘅（學校），神就會開門，終於，神打開咗兩扇門。」

撰文：陳阜賢

攝影：鄭慧盈

Make up: Meegan Seak@Brighten Up Image Production

Hair: Sekio Sin@Hair Culture

Wardrobe: boraaksu.Asia

Location: Cozy Play Town