兩個完全平行的世界

今日睇到電視台報道，話三藩市經濟復甦，今年的旅遊人數相比上年大幅回升，更令人振奮的係，街頭無家可歸者的帳篷數量，足足下降咗超過八成，好似真係一片歌舞昇平。

​清晨出門，天仲未光，街燈照住微涼的廣場，四周總有一種難得的乾淨與清靜。太陽未升起，我習慣步行去健身房，出一身汗，將自己重新啟動。

​行到健身房門口，眼角掃到地上有一團蜷縮的陰影。

​初頭以為係邊個掉低的大袋垃圾，行近兩步睇清楚，原來係一個人。佢用一張殘舊的薄氈由頭到腳緊緊裹住，就咁直筆筆瞓喺冰冷的水泥地上。過往見慣的街頭流浪，起碼仲有頂帳篷或者幾塊紙皮擋風，如今連呢啲都冇埋。

​呢一幕，即刻令我想起當年湯漢斯（Tom Hanks）主演的一套經典喜劇《金錢陷阱》（The Money Pit，港譯《金錢屋》）。戲入面原屋主將殘破不堪的舊屋粉飾一番，賣畀毫無經驗的新買家，結果新主人使盡金錢修修補補，引出一連串荒誕笑話。如今政府為咗交出一張美化市容的成績表，強行清走露宿者的帳篷，營造出帳篷減少八成的假象。結果人依然無家可歸，只係連最後一層遮蔽都被無情拆走，赤裸裸任由城市將佢遺忘喺路邊。後來我查了一下，英文將這種連帳篷都冇、直接瞓喺街頭水泥地上的露宿者稱為「Rough Sleepers」，字面看似平淡，背後卻道盡了風霜與冷酷。

​我腳步頓咗一頓，小心翼翼繞過佢行入去。心入面唔係驚，而係一種難以言喻的荒謬與不安。動物園入面的動物，起碼仲有遮風擋雨的棚舍，定時有水有糧，病咗有獸醫照料。我絕無貶低任何人的意思，但眼前這一幕實在令人唏噓，唔知由幾時開始，一個活生生的人，喺文明社會入面的生存尊嚴，竟然連動物園的動物都比唔上。

​推門行入健身房，暖氣同音樂撲面而來，跑步機上的人奮力邁步，追逐健康與體能。我企喺落地玻璃窗前望返出去，深呼吸平復一下情緒。一塊透明的玻璃，就咁生硬咁將同一個清晨切成兩個完全平行的世界。

​好多人以為城市的繁華與真實要喺白日的喧鬧中尋找，但其實最赤裸的真相，往往就藏喺你以為最乾淨、最安靜的破曉之前.