【長假後感（上)】愛獨處卻不懂獨處

假期應過咗一大半，剩返半個星期就結束。今次獨遊我有啲新嘅發現。

我嘅人生好長時間都係一個人，而我一直都覺得自己好喜歡一個人，同埋好享受嗰個過程，今次都唔例外。但係呢幾日我喺度諗：「我係咪真係識得同自己相處？我係咪真係識得好好運用獨處嘅空間呢？」當我咁樣問自己嘅時候，我發現答案係否定嘅。

其實好多時，我都好希望珍惜光陰，所以就算獨處，或者一個人生活，我都好希望分配好時間做唔同嘅事，都唔希望坐喺度發吽豆，如果唔係就覺得好似嘥咗。但係發吽哣嗰個空間其實都好重要，因為人就係需要有空間去面對自己，信徒都需要空間單獨同上帝相對。呢啲時間係非常重要而寶貴，因為我哋需要時間同空間觸摸自己嘅內心，亦都讓上帝加入，引導我哋進入自己嘅內心，睇到自己真實嘅狀態同需要，如果唔係我哋就好容易俾呢個世界或者其他人嘅意見牽着走。其他人嘅意見係好寶貴，呢個世界嘅教導都有佢嘅道理，但係並唔係適用於每一個人，因為每一個人都係獨特嘅。

今次嘅假期去到尾聲，我都反省自己一直以來究竟點樣同自己相處，又點樣同上帝以及身邊嘅人相處。希望接住落嚟，我可以真係學識點樣去慢活，放慢步伐，同事有多啲安靜停低落嚟嘅時間，唔需要充實太多嘢，而係好好停低感受吓自己內在嘅狀態，亦都因為能夠停低落嚟，而能夠聆聽上帝嘅聲音。

唯有整理好自己，我先可以做返上帝原本創造嘅嗰個我，然後用真正嘅我同其他人相處，同呢個世界接觸。我諗呢個可能先係上帝對我嘅心意。

唯有認識清楚自己嘅內心狀態，先唔會做錯決定，亦都冇咁容易行錯路。有時我哋以為依家呢個狀態並唔適合自己，其實可能係純粹自己唔鍾意，所以逃避。或許依家呢個狀態同埋依家呢個自己，正正就係上帝設定嘅時候已經計劃同安排好嘅，只係我哋唔清楚、唔接受或者唔理解。唯有好好靜落嚟同自己仲有上帝相對，先至能夠慢慢搵到答案。