【#一粒塵在人世間｜001】有一間店，叫《咖啡王子一號店》

10/10/2016

有一間店，叫「咖啡王子一號店」。

我已經唔記得第一次接觸《咖啡王子一號店》係幾時、喺邊度，只知道一睇，就愛上。

查返維基，佢應該係 2007 年喺韓國播放。

而我嘅印象係，有一日喺大陸買咗套 DVD，拎返屋企，一集一集咁睇。

九年。

但我諗，我對咖啡嘅迷戀，遠遠唔止九年咁少。

夢想，究竟點樣先可以捉得住？

開一間咖啡店，係我細細個就有嘅願望。

20 歲嗰年，我為自己訂立咗一個十年計劃，

希望 30 歲之前，可以擁有屬於自己嘅一間 cafe。

30 歲，已經過咗。

Cafe，未開成。

但個夢，依然喺度。

好多人都會問我：「點解十年都仲未做到？」

其實好多時候，我都唔知點答。

可能太多嘢想做，

可能唔夠專一，

又或者

正正因為太多「可能」，所以冇成功。

呢十年，我究竟做過啲咩？

學過甜品，

做過 cafe，

去過 working holiday。

話多唔多，話少唔少。

有時我都會問自己：

夢想，係一個終點？定係一段過程？

前陣子，有個 auntie 問我關於夢想嘅事。

我其實好感激佢。

因為正正係佢，令我第一次認真回望自己行咗十年嘅路。

當大部分人都在乎結果、成就、之後點延續，

我先發現，原來我真正在乎嘅，係過程。

點樣學習、點樣成長、

點樣一步一步鋪排自己嘅人生，

點樣慢慢啟動一個夢。

雖然到依家，我依然好似「一事無成」，

但我內心，係滿足嘅。

2016 年，我終於去到韓國首爾。

終於可以親身去搵「真正」嘅咖啡王子一號店。

可惜，去到先發現…原來，已經結業。

嗰一刻，好失望。

但又好奇怪。

正正因為《咖啡王子一號店》，

我到而家，依然繼續發夢。