創立D45 系統的原因與目的

《TQQQ｜D45 系統 追尋夢想之旅》日誌:9/13/2026-3

創立D45 系統的原因與目的

大家或許感到疑惑，雖然我在TQQQ身上找到自己的影子，明白一個人被誤會係幾咁痛苦，咁寫一、兩篇文章已經足夠，又唔係有稿費收，何必咁認真寫百幾篇文章，誇張到咁？你哋咁樣諗係十分正常。問題係我，本身就唔係一個太正常嘅人，對於自己認為正確嘅事，我會義無反顧、勇往直前去做，任何人都阻唔到我，就算有人恐嚇我「你將會死得好慘！」

既然係寫回憶錄，總唔可以只講自己幾威幾勁，講到自己好似聖人一樣，咁樣寫就冇意思。D45亦都唔係聖人，有時會做一啲唔係普通人會做嘅事。我好勝，總係不斷嘗試突破（唔鍾意用「試錯」呢個詞，因為我討厭失敗），更加不時鍾意挑戰底線、破格摸索別人底線，甚至挑戰權威。我亦曾經因為挑戰，令到一個網站結業。

大家可曾聽過一個名為CSN23嘅綜合網站？呢個係大名鼎鼎、人稱鳳姐嘅陳世雁，佢23歲時創立嘅綜合社區網站。當時我被網友推舉做愛情版版主，屬義務性質。由於網站成立時間尚短，需要吸納更多網友加入壯大聲勢，唯隔離家庭版嘅版主就有啲倒米。好多網友上載貼文到網站，好快就被佢以「已經刊登過」為理由刪除。當網友查詢原因時，佢好多時恃住自己年紀大，欺負唔善辭令嘅後生仔、後生女，用極唔客氣、唔禮貌嘅口吻話貼文已經登過唔可以重發。當時我睇唔過眼，膽敢去佢負責嘅家庭版挑戰。當然我比佢有禮貌得多，我指出：你成日刪除人哋嘅貼文，聲稱已經刊登過，其實只係一己之見。每日海量貼文上載到網站，轉眼間就唔知去咗邊。你做版主成日駐守網站，先至可以話睇過；其他人就唔係。同時，你咁嚴厲批評年青人，會嚇走佢哋，唔敢再上嚟。

寫完整篇貼文，老婆睇見面色一沉同我講：「公主（該版主），你都咁串佢，你都唔知死字點寫，快啲道歉，叫佢刪咗個POST。」但我覺得自己冇做錯，點解要驚佢？我就唔理。公主亦冇刪除篇POST，亦冇即時反擊，一時風平浪靜。誰知山雨欲來。當我稍為鬆一口氣，公主身邊嘅支持者已經全速喺網上連珠發炮。佢哋好有默契，兩人一組，說話此起彼落，一唱一和，淨係識人身攻擊、惡言謾罵，完全偏離我原本想講嘅議題。我見對手水平太低，懶得回應，隨便回個笑臉應酬下就算。事件就係咁擾攘一輪之後不了了之。但陳老總就以呢件事太麻煩為理由，索性關咗個網站。

而我就成為CSN23倒閉嘅導火線，但我認為「太麻煩」唔係真正原因，反而係對於陳老闆其他更大嘅生意而言，呢個網站太細碎、唔值一談。大家覺得係唔係？

兜咗一大圈自爆舊事，而家言歸正傳。一直以來，我都好尊敬傳媒入面嘅股評人，但對於佢哋嘅利益申報，就有所保留。尤其係佢哋喺節目入面講十幾隻股票，逐隻講好，之後申報自己一隻都冇持有。就算佢喺節目講得幾精彩，我對佢嘅評論都會打個折扣。情況就好似一位食家介紹十幾間食店，叫觀眾去試，之後就話自己以後都唔會再去幫襯，咁樣荒謬。

D45就唔一樣。我為TQQQ辯護嘅同時，亦屢屢有所斬獲。而我所用嘅金字塔遞增投資策略，亦係專門為TQQQ而設計，係一套針對性極強嘅改良平均成本法，想佢輸都唔容易。莫講你用嘅係閒錢，唔怕捱價；就算突然需要現金，亦唔使擔心。以TQQQ本身嘅波幅計，就算係今年最淡靜嘅年初，都有4%嘅波動，好大機會喺一次像样嘅反彈分段沽出，唔使蝕本。恕我講句大話：喺呢個框架之下，投資TQQQ想蝕本，反而比賺錢更難。因為賺錢只係遲早嘅事，最多等股價回升先至離場；而沽貨機會總會出現，只要捉住其中一段反彈就可以保本，根本唔係難事。

由於我對當中運作瞭如指掌，經過一番深刻反省之後，又懂得調動資源，唔會一有閒錢就急於入市，儲備資金以備不時之需。加上我本身鍾意接受挑戰，識得善用壓力；喺壓力之下操作，我反而覺得更有挑戰性，創造更好成績。於是我決定挑戰自己，將我日常投資嘅部署透過D45系統公開，等大家睇到：一個好勝嘅人，點樣主動為自己增加壓力，最後反而比冇壓力嘅時候賺得更多。到今日，我仍然相信黎泉輝先生講嘅一句說話：「潛能無限，除非自己劃地自限」。

至此，D45系統已經有咗初步輪廓。我為自己未來可以喺各方面變得更強而高興，因為D45系統終於正式成立。