你知唔知道我哋廣東人（香港人）嘅學校係應該用粵語教育、教育粵語？

作為粵人，可能好多人都聽過粵語差啲成為中國嘅國語、國語發音、法定語音，但因為差一票或顧全大局輸畀北京話，諸如此類講法。呢類講法係中華主義者作出嚟嘅流言。好簡單，呢類講法有冇可據嘅來源？詳細歷史資訊又有冇？

之所以有普通話，其實係因為兩個運動。分別係，白話文運動同國語運動。其實，白話文運動原來嘅意思係，白話文運動原本應該係，用當地嘅語言寫文章、用當地語言教育、教育當地語言。亦即，我哋嘅學校原來係應該用粵語教育、教育粵語。

國語一名係嚟自國語運動，即推行國家語言同其標準發音嘅運動。但原本要推行嘅係白話文運動，即係我手寫我口，亦即係寫口語，好似我宜家咁。之所以舊中國會將白話文運動同國語運動一齊推行，混淆不堪，係因為佢哋係「抄考」日本。

明治開始，日本就進行文體變革嘅運動。原本，日本係以漢文作為書面語，漢文即係文言文，變成以口語為基楚所做嘅一種新嘅「言文一致體」。明治至戰前係過渡期，使用一種叫「漢文訓讀體」嘅文體，戰後則所有公文都改成為「言文一致體」，而且亦唔再叫做「口語文」，而叫做「現代文」（現代日語）。宜家日本嘅學校教育係教三種文體架，即係，古文、漢文同現代文。

當時日本文人係大量創造白話文文學去建立言文一致體架。白話文文學就係口語文學。而日本咁做係參考西方，以口語文學擺脫廣域嘅共通語，去建立一種更強力、更精實嘅在地身份認同去取代含糊不清千人一面嘅廣域身份認同。即係，白話文文學，正確嚟講，應該係，「方言文學」。就好似英格蘭擺脫拉丁文，改為寫英文咁。所以日本將白話文運動同國語運動同時進行係冇問題架。錯嘅係，舊中國嘅文人照搬過去，變咗創造新嘅共通語。

胡適喺1917年《文學改良芻議》提倡白話文，喺1918年《建設的文學革命論》就變咗提倡國語，話要做「國語的文學，文學的國語」，並話係唯一宗旨，話「我們所提倡的文學革命，只是要替中國創造一種國語的文學」。錯誤嘅國語運動已經完全將白話文運動覆寫。

1913年，「讀音統一會」確定國語嘅讀音標準，呢套標準音習慣上稱之為「老國音」，集合南方同北方發聲元素，有五個聲調。1923年，當時嘅「國語統一籌備會」成立咗「國音字典增修委員會」，決定採用北京語發音標準，稱之為「新國音」。

唔理係老國語定新國語，普通話（國語）雖然以北京官話為基礎，但係就係一門新造嘅語言。反映呢點嘅係，普通話冇北京話嘅粗口，亦非常欠缺粗口。粵語係非常多粗口，因為一門會喺日常生活使用嘅語言歷史悠久，就會喺日常生活中累積大量粗口，就好似英語咁，都係非常多粗口。另一方面，普通話原本係設計嚟做雅言，一開始亦冇設計粗口。

其實，因為推普，北京話亦瀕臨滅亡。

老國音：zh.wikipedia.org/wik...
國語運動：zh.wikipedia.org/wik...
日本嘅文語體同口語體：ja.wikipedia.org/wik...
日本國語科嘅資料：ja.wikibooks.org/wik...