圖輯｜九龍城土收程序啟動 源茂興記茶莊 潮州雜貨店葉盛行 老店告別
文｜集誌社記者
隨九龍城衙前圍道及賈炳達道重建計劃展開，不少九龍城老店相繼結業。自 1954 年開立、屹立南角道逾 70 年的「源茂興記茶莊」，今（31日）光榮結業。不少街坊、熟客前來送別。老闆之一細劉生難掩傷感，也看得淡然：「人生好似搭巴士，梗係有上有落，有停站、有開車。」
早上開始，「源茂興記茶莊」已有不少前來買茶葉的客人，另一位老闆大劉生熟練地秤重、包茶葉，細劉生熱情地介紹各種茶葉，店內不少放茶葉的櫃已清空。客人在店內各個角落拍照，滿載而歸離開，大細劉生都與他們互道：「身體健康！」
日本旅客驚訝、傷心
來自日本的 Yumiko 是「香港迷」，熱愛香港中西合璧、能容不同文化，自 90 年代已來港近 200 次，疫情前每個月訪港約一次、復常後則一年數次。知悉茶莊結業，她特意趁行程最後一天到場，購得老闆推介的水金龜和佛手鐵觀音，整個下午也在茶莊拍照、與老闆聊天。
Yumiko 憶起，以往因來往啟德機場而常出入九龍城，後來機場搬遷，她未有再來，直至兩年前重訪，「我非常驚訝，發覺這裡所有東西都沒有改變！」Yumiko 明白重建的需要，但對茶莊結業仍感到非常傷心，指茶莊以家庭式經營、老闆與客人關係密切，是非常美麗的傳統文化。時代急速轉變，Yumiko 說她既愛香港的新事物、也愛舊文化，「每次來香港，我都覺得是我所經歷最舊的香港，因為下一次有些事物又會改變了。」
「執吓一間，咪一路一路少」
八十後余小姐，今前來買了一大袋鐵觀音、普洱、白茶。學茶、愛茶的她，最近兩個月開始來光顧，與兩位老闆「幾好傾」，讚兩人「好均真，唔會特登標好高價」。她對茶莊結業感可惜，指現時老茶行已很少，「如果執吓一間、執吓一間，咪一路一路少。」
常出入九龍城的余小姐認為重建「無需要」，她指最大特色是幾條街，都有相類的建築，「如果其中一忽冇咗，其實你一個區嘅特色就冇咗」。《九龍城寨》電影爆紅，政府於九龍城寨公園設置展覽，余小姐嘆做法矛盾：「你真正要保留嘅係真實存在嘅建築，而唔係真嗰條街你拆咗去唔保育，起一個新嘅博物館，然後將假嘅嘢放入個博物館叫啲人去睇。」
盧小姐今特意從清水灣乘車來茶莊買茶葉，對茶莊結業同感可惜，她認為，老茶舖應好好保存。她拍下大劉生以方紙包茶葉的過程：「好唏噓囉，呢啲唔係我哋細個嗰啲好出色嘅工藝嚟㗎咩？冇啦。」
啟華魚蛋四哥：好唔捨得
同位於南角道、經營「啟華魚蛋」逾 40 年的四哥，晚上亦來訪。啟華魚蛋打算十月中結業，與大細劉生同在九龍城長大，幾十年朋友無所不談，四哥坦言「好唔捨得」，「以前朝朝早行過去飲佢杯茶，第時冇得飲咯」。他說，以前對喝茶不太講究，但常去茶莊試茶後「學識飲茶」，「咩茶飲到咩味、同埋好唔好飲，喺佢嗰度學返嚟」，「你話佢走咗之後呢，就試唔到咁多茶種喇。」
一街之隔，位於衙前塱道的潮州雜貨「葉盛行」也於今日結業，貨架全部清空。老闆葉先生說，通關後「冇生意」，不選擇回遷，「唔做喇，走喇，移民吖嘛。」
細劉生：喊咗好多次㗎喇
晚上八時，大細劉生合力關上店舖的舊式鐵閘。現年 65 歲的大劉生將會退休，他笑言「全日冇停過，攰到唔知講乜」。現年 59 歲的細劉生則感性地嘆了一口氣：「唉，其實要喊呢，已經喊咗好多次㗎喇，佢（2022 年 5 月）一話（人口凍結）登記呢，我都已經半夜扎醒喇，真係夜晚三點鐘札醒，跟住係瞓唔返喎。究竟會點呢？將來條路會點行呢？即係個腦會諗呢啲嘢，枕住十日八日。」
「但係冇辦法啦，實在講，點講呢，人生好似搭巴士，梗係有上有落，有停站、有開車，只不過係一個大站嚟啫而家。對我嚟講，我會繼續做嘢囉，但唔會做呢行咯，好辛苦好攰。」細劉生苦笑。
茶莊的裝潢五十年不變，店內的不銹鋼茶罐已全數賣出，老招牌、燈箱、膠貨架、甚至地磚也有熱心人士認投。接下來兩周，大細劉生會在店內處理客人提貨和善後，預計八月中正式將店舖交還市建局。
