九龍城重建1｜源茂興記 七十年老店不獲邀回遷 兩噸普洱青餅 因重建「夭折」
文｜集誌社記者
「身體健康！」、「有緣再見！」。隨九龍城衙前圍道及賈炳達道重建計劃展開，自 1954 年開立、屹立南角道逾 70 年的「源茂興記茶莊」，於 7 月 31 日結業，8 月中正式交還市建局。門口的招牌和燈箱已被拆除，只餘輪廓，鐵閘貼上市建局物業的告示。
《集誌社》在茶莊結業前，訪問第二代負責人劉氏兄弟，細劉生說本來不想言休，但市建局沒邀請回遷、收購價又不足以購買新舖位，「根本係逼你冇得撈」，加上大劉生決定退休，最終選擇光榮結業。由公布重建到遷出只有三年，有兩噸普洱青餅因未存夠 20 年、「未用得」而需棄置。
方紙包茶、人手搣茶餅、自家工場烘培鐵觀音，劉氏兄弟堅守父親教晦，做茶之道七十年如一。在九龍城出生、長大、工作，臨別固然不捨，但發展巨輪下只能無奈接受。
從討厭到接手
源茂興記由劉氏兄弟的爺爺在潮州創立，五十年代內地土改時，舉家偷渡來港，先後在上環、深水埗、九龍城、旺角等開設分行，高峰時有五間分店。位於九龍城的分店，於 1954 年在南角道 32 號開業，由劉父經營，七十年代因原舖位要重建，遂搬到對面的南角道 31 號，並在新蒲崗設有工場。
在南角道留產所出生、一家七口在店舖過着前舖後居的生活，劉氏兄弟的生活離不開九龍城。細劉生劉偉豐不諱言，小時候很討厭父親做茶，因五兄弟姊妹放學後，還要幫忙店舖的工作，幫茶包封口、綁茶葉，「有邊個細路仔想放學返嚟做嘢？」。
父親說他夠力，特意着他搣茶葉，「我六年級已經開始搣茶葉搣到而家！」至晚上九時多完成工作，才開始做功課，「我老竇有句口頭禪，幾時先天光？佢意思你 12 點嚟做，仲有六個鐘頭畀你做先天光啦」，他笑說。
長大後，細劉生試過做建築、速遞等工作，茶莊則由二哥劉偉亮和舅父打理。大約 27 歲那年，臥病在床的父親對他說，舅父快退休、茶莊只餘二哥一人，「不如你諗吓返嚟啦」。「咁我咪返嚟囉」，細劉生一口答應父親遺願。
「佢自己嘅心血，可以唔使收檔，梗係想延續落去。」
搣茶餅、烘焙加工 七十年的堅持
這一做便是數十年。細劉生憶述，以往士多、辦館會取茶包來賣，街道兩旁又全是大排檔，茶莊從事不少批發生意，除茶葉外、甚至會將咖啡交給大排檔。但隨士多、辦館、大排檔漸沒落，「𠵱家邊度有（大排檔）啫？交都冇得交！」茶莊亦主力零售。
細劉生說，八十年代初是茶莊全盛時期，當時日本人興起買茶葉，會來港掃貨，「問你有幾多，掃到你貨倉一滴都冇」。茶莊位處機場旁，也是不少人送禮之選，但隨着九龍城寨和啟德機場於九十年代陸續拆卸，人流也大幅減少。
這些年來見證周遭商舖和街坊的變化，店內裝潢、還有做茶的工夫，卻五十年如一日。「我哋 70 年前，我老竇個標準係點樣樣，我哋𠵱家嘅標準都係咁樣樣。」多年來，源茂興記堅持以自家工場烘焙鐵觀音，將烘焙了的春茶和秋茶混合，放三個月至半年退火，再混合前一年的茶葉增加口感。店內不開冷氣，只以天花的吊扇降溫，以免茶葉受潮；並以雞皮紙袋和方紙包裝茶葉。
堅持多年的，還有以人手搣茶餅。滿頭大汗的細劉生，熟練地以小鐵剷將茶餅分拆，再以手搣散，背後原是出於對顧客的體貼——「舊茶餅硬得濟，幫啲老人家搣散佢，佢想飲啲𡃁啲嘅茶有得飲。」試過有客人趕着離港，一日內買 40 斤茶葉，一塊茶餅半斤，他便逐一搣到凌晨一點；幾十年來搣到有「彈弓手」、手指也伸不直。
「老竇教落，（做茶）最緊要有良心，點樣都有啲品質保證」，細劉生語帶自豪。
搣茶餅有何技巧？細劉生笑說，第一是「千祈唔好插親自己隻手」，第二都是「千祈唔好插親自己隻手」，並張開手掌，展示掌心的三顆楬色點：「呢三粒唔係癦，係整損咗，然後啲茶沫走咗落去，沖咗啲茶漬喺度」。一雙滲入茶漬的手，印證多年來做茶的血汗。
「唔係唔想做，係冇得做」
原本，大細劉生設想，茶莊起碼可再多經營十年，但一個重建計劃，將一切全盤打破。2022 年 5 月，市建局公布「衙前圍道／賈炳達道發展計劃」，宣布將重建衙前圍道、南角道一帶約 3.7 萬平方米範圍，包括源茂興記茶莊、崇麟鞋業等老店。
「真係晴天霹靂。」細劉生說，「我哋兩兄弟諗住唔做嘅話呢，係我哋自己決定」，可以預先計劃店舖十年的安排、如何慢慢清貨，「冇諗過𠵱家人哋同我哋決定」。就像打麻將，「話明打八圈，𠵱家三圈就叫我收工，你當然一定唔開心啦。」
教他萬般不解的，還有不被市建局視為「特色商戶」，不像其他「潮泰食品及餐飲店舖」獲回遷資格。「呢個問題我自己都諗唔明，你掛得潮汕嗰樣嘢，喺呢條街所有潮州嘢，你正路都要問一問卦？」，但市建局卻從來沒有就回遷與他們接觸。「因為佢唔當我哋係潮州人啦，佢話保留潮泰文化，茶葉唔係潮州人㗎」，細劉生自嘲，語氣盡是無奈。
細劉生不是沒想過在同區另覓舖位繼續經營，但市建局的賠償太少，「佢出個價低到咁樣，根本冇得畀你諗，你根本買唔到一個新嘅舖，根本係逼你冇得撈」。加上大劉生決定退休，「兩支筷子得返一支，一個人做唔掂」，最終選擇光榮結業。
「我唔係唔想做，係冇得做」，他苦笑。
只能棄置的兩噸普洱青餅
結業在即，許多熟客來光顧，平時買一包的，改為買十包，也有人一口氣買 40 斤、60 斤茶葉。「我哋啲鐵觀音同出面街唔同，人哋賣青嘅、我哋賣烘焙嘅，唔係度度買到。」每所茶莊的茶葉味道不一，不少客人問細劉生，哪裡可以找回同樣的茶葉？「我話冇辦法，我都畀唔到你，因為要工場做」，細劉生語帶無奈。
為準備結業，兄弟二人早於四、五個月前結束了新蒲崗的工場，又於結束前數天將兩隻貓店長遷回細劉生在沙田的家，並將櫃上一排排有 50 至 70 年歷史的不銹鋼和錫製茶罐全放上網出售，差不多已賣光。
少數無法好好處理的，是還有兩噸普洱青餅，因為「未用得」，只能全部扔掉。細劉生解釋，普洱青餅最少要放 20 年才能賣，但現在有些只放了十年八載，太過青澀還不能賣，加上行家不知道以往的處理過程、不會接收，「最少有兩噸貨要抌。」
「我問市建局我啲茶葉點呀？佢話你可以唔使抌呀。佢可能唔識啦，以為係茶就飲得」，細劉生笑笑。十年的心血，他打算就此擱在貨倉，讓市建局一併收回，「無辦法可惜與唔可惜，係事實，做生意賺頭蝕尾，你做邊一行可以清得晒？」他無奈道：「呢啲咪就係市建局帶畀我。」
「咩都唔捨得」
離開活了大半輩子的舖頭，會不捨得嗎？「梗係啦，都唔使講喇呢啲」，細劉生失笑。「其實咩都唔捨得，你由細到大生活喺嗰度、嗰個環境，你有咩你會捨得？冇一件你會捨得。如果你捨得嗰啲你抌咗啦。」
但在市區重建巨輪下，老舖和小市民沒得選擇，「冇辦法，呢樣嘢你都控制唔到，主動權喺晒人手，根本個發球權唔喺你度吖嘛，你係被動吖嘛，邊有咁多嘢諗啫。」
店舖 7 月 31 日結業後，大細劉生留下收拾，至 8 月中正式交還市建局。繼承了數十年的手藝、多年來的回憶、還有那兩噸茶葉，將在推土機下消失。未來有什麼打算？現年 59 歲的細劉生說，打算休息兩三個月：「睇吓條路點行囉，其實人生好多個站嘅，你睇吓邊個站上車咪做第二樣囉，冇所謂㗎。」
那還會再做茶嗎？「唔會囉。」
細劉生說，時代不同了，做茶這門辛苦手藝，下一輩難以堅持。「係我哋兩兄弟咁戇居繼續堅持㗎啫，好似人哋嗰啲校咗冷氣，一包包喺度咪算數囉，咁辛苦為咩？」他一貫自嘲起來，接續又認真說：「其實人都係要有啲堅持嘅，咁你唔堅持嘅話，人哋都唔會話，你開咗七十年喇。」
