嘗試粵文書面語創作

其實，我一直都唔明白粵語粵文點解係「唔夠正經」嘅語言文體。

由細到大，我哋土生土長香港人嘅中文教育經驗係講一套寫一套。學校中文科老師一直提點我哋寫文章要用「書面語」，將口語入文係大忌係錯誤，老師會用紅筆圈住並標註「要用書面語」之類。

粵文或者「寫廣東話」唔係未見過，但係多見於私人通訊或八卦雜誌。文學創作都可能會有， 但一般粵文應用都係止於三幾句，於小說於詩，以增強香港本土特性、語感或者幫助讀者代入角色。但通篇文學創作以粵文書寫嘅真係唔多見非常唔主流。連廣東話歌嘅歌詞都唔係以純粵文入詞，而係「書面語」居多再加啲粵詞彙。

而家嘅「中文書面語」係乜，對我嚟講，就係用咗的的了了這裏那裏嘅「華文 / 普通話」。粵語真係唔夠正經，唔可以入文，唔可以有自己嘅書面語？

但係觀乎好多正經嘅場合，包括各大學中學小學嘅畢業典禮致辭，又或者法庭嘅辯方陣詞法官判語，再或者電視台嘅新聞報導，用嘅講嘅全都係一本正經莊嚴肅穆嘅廣東話。

今日嘅「中文書面語」，亦唔係一開始就存在，而係經過長時間有人書寫閱讀整理使用，慢慢建立起嚟。語言無所謂高低級，無話邊種只可口講邊種可以入文。廣東話發展成熟，幾乎每一粒廣東話音都可以用一個漢字寫落嚟。甚至乎一啲現代常用嘅粵詞彙都可以喺好湮遠嘅唐宋詩詞搵到。話粵語唔可以入文，唔夠正經，原因真係耐人尋味，有待大家一齊討論思索。

基於呢個信念，以及眼見仲有好多人批評粵文唔夠正經唔可以登大雅之堂，於是就一時衝動聯同好幾位志同道合熱心推動粵語粵文嘅有心人，搞咗一個全球兒童青少年粵文創作計劃。點解做兒童青少年？因為我自己有一個海外出生長大嘅半唐番女兒，以往一直思索點樣可以將粵語傳畀佢。畀成年人閱讀嘅粵文創作已經係少數。畀小朋友嘅就更加非常有限。透過兒童青少年粵文徵文，我哋就可以徵集到「真兒童作品」，而兒童青少年透過實實在在用粵語寫粵文，亦可親身經歷用語言創作文字嘅快樂。我希望通過一個認真公開有評審有出版成果嘅徵文活動，證明粵文同樣可以承載文學創作。

不過，要改變一個一般香港學校嘅固有觀念，談何容易？所以，我哋嘅活動收稿係有困難嘅。去年我哋收到嚟自世界各地共四十幾篇文章。今年活動七月底截止，暫時只係收到九份作品。有試過邀請認識嘅香港校長老師朋友推廣一下，不過得到嘅反應係︰「好難喎，我哋學校叫同學仔寫書面語，你家下叫佢寫口語？」我明白香港中小學教育者嘅位置，佢哋嘅諗法亦正正反映咗香港教育一直以嚟對粵文嘅定位。

我手寫我心，用粵文入文其實可以好文學，亦可以探討嚴肅正經嘅議題。讀返我哋舊年嘅入選作品，溫俊熙就喺佢篇《的士佬嘅日與夜》透過書寫的士司機嘅一日，側寫佢身處嘅城市。鄭凱譽嘅《北上消費症》用輕鬆嘅筆觸跟讀者討論港人北上消費嘅社會現象。

用粵文寫文章其實非常自然合符兒童語言發展。你見香港學校要用力提醒學生寫「書面語」就知，要個以粵語為母語嘅香港學生，我手寫我心係幾咁易，將粵文翻成華文書面語事實上係一種腦力挑戰。對於喺海外非漢語地區長大嘅孩子，學習粵語本來已經比香港孩子困難得多。要佢哋講一口流利廣東話已經唔容易，如果佢哋因為未識另一套書面語而唔可以享受閱讀嘅樂趣，或者以母語寫出自己想講嘅故事，咁佢哋失去嘅唔單止係漢語閱讀書寫嘅能力，而係一種以母語思考、創作同表達自己嘅機會。

如果你認同粵文值得被更多人閱讀，或者身邊有鍾意講故事鍾意寫作嘅小朋友，不妨鼓勵佢哋試一試粵文創作，參加我哋嘅全球兒童青少年粵文徵文。

全球兒童青少年粵文徵文歡迎電子交稿，即係話參加者唔使手寫文章，可以利語音輸入文字。另外，我哋亦接受家長嘅幫助，以鼓勵海外孩子嘅參與。不過記得，家長只可以幫助，例如喺選詞用字造句方面提供意見，孩子仍然要係文章創作嘅主導者。

徵文活動截稿日期八月一號朝早10點正（GMT）。歡迎世界各地五到十八歲嘅兒童青少年參加。如果你想知更多徵文活動嘅訊息，或者閱讀去年嘅入選作品，歡迎到「我手寫我心」網站睇睇︰https://writingfromtheheart.org/

我哋亦有一個一對一三十分鐘嘅網上教室，指導同學仔預備粵文文章參加徵文活動，報名網上教室可以去呢度︰www.eventbrite.ie/e/...

趙婉慧

《橋底老虎》作者