《Dear Tech #01》：Apple 係咪大到不能唔出機？

📱💭【Apple 係咪大到不能唔出機？】

呢幾日研究開 Galaxy Fold 6，順便諗返轉頭，其實我一路都好鍾意用 iPhone，但今年開始真係感覺有啲「悶」。

大家都知 iPhone 佔 Apple 超過一半收入，但我覺得佢重要性唔止咁簡單，佢根本係整個 Apple 生態圈嘅中樞 — — iCloud、Apple Music、App Store、Apple Watch、AirPods… 全部都要靠 iPhone 帶動。如果 iPhone 冇突破、失勢，成個 ecosystem 都會打冷震。

我成日覺得而家 Apple 最大問題係：「大到不能唔出機。」

每年要出新機，因為成條供應鏈、YouTuber、電訊商、配件商都等緊你出貨。就算部機冇突破都要出，否則股價會跌、評價會插。成件事變得好機械，唔係 innovation，係 obligation。

有少少似當年香港漫畫業 — — 每星期出一本，讀者開心、商家賺錢，但最終就變咗機械式生產，質素下降，最後連讀者都走晒。

今年如果 iPhone 17 又係無乜 AI、無乜相機突破，我覺得 Apple 真係要小心。你未 ready，市場未必會等你。唔係個個都可以等你「造好啲先出」，AI 比賽係用緊年做單位計。

BTW，我唔係 Apple 黑粉，只係一個用咗佢十幾年產品嘅用家，呢幾年開始多咗一種「難言失望」。

⸻

📩 致 Apple：唔係「停一停、諗一諗」，係要「唔好停，即刻諗」。