交易長跑 — 第四篇：數學上必勝的方法？

上一篇見我講寫EA有紋有路，但我果時係無成功到的。當時唔明白寫EA的core，係要有咗個有效的策略先，而唔係直接寫。當時我只係識用唔同指標組合，只知道突破，以及均值回歸的策略，無一個有效的策略，亦無寫到一個EA應有的component，呢樣遲啲會再講。

寫EA搞咗好耐，結果都係唔好，一係back test結果唔好，一係back test ok，但live唔得。開始對自己寫EA失去信心，想嘗試其他方法。

⚠️ 警告：如果想長期係市場生存，強烈不建議用以下嘅策略，一輸就清袋！

係網路睇到數學上必勝的方法，馬丁策略，即刻叮一聲，即係去了解係咩一回事。

如果你睇到一條資產曲線係好平滑向上，突然有一個好大的下跌，但極快升返去原個位，又或者突然有一個好大的上升，但極快跌返去原來個位，好大機會係用馬丁策略。先跌後升係先close lose trade，最後close win trade，而先升後跌就係先close win trade，後close lose trade，都係一樣。

如果只係望條資產曲線，真係好吸引，感覺好穩定。介紹我入坑嘅朋友都有用馬丁策略，當年我仲讚佢個策略好勁，輸咗咁多但極速回復。佢仲答我，佢個策略防守好強。而家睇返，真係好天真好傻。

講返少少馬丁策略的原理。

馬丁策略係加倍賭注法，每一次輸錢後，將下一次的注碼加倍，只要贏一次，就能收回之前所有輸咗嘅錢並獲得最初的profit。即係假設第一注係$10，贏係賺$10，輸係蝕$10。如果贏，下次繼續落注$10。如果輸就加大注碼，變成$20，當$20贏，就cover返之前輸嘅$10，再贏多$10。但如果輸，下次就再加注到$40，如此類推。假如你有無限金錢，真係一定唔會輸。又或者如果本金有限，只要唔係連輸N次，就可以recover。

點應用落去CFD呢？頭先講到馬丁策略點樣唔會輸，一係無限金錢，但我哋無無限金錢，呢個無可能，二係唔好連輸N次。所以我用馬丁策略時就係針對第二點，有兩個方向去避免或者減低風險。

一係提高win rate，咁就好細機會出現連輸的情況。一般要提高win rate，可以減低風險回報比，例如由1:1 RR減到0.2 RR，win rate會提升好多。又可以加filter，過濾雜訊，理論上係咁，實際上未必，仲有時會過濾咗高質的交易機會。

二係增加N的容錯，例如最初頭落0.01手，資金容許連輸N次，如果最初頭落0.04手，資金只容許連輸N-2次，所以會選擇用細手數開始，增加容錯空間。結果就係win rate好高，但每次都只係贏少少，只要連輸次數細過N，無問題。

開始前有做back test，結果ok，行咗一個月demo forward test，都ok。就又開咗個account放一千美金行。

頭兩個月好好，賺咗二三百。有吸取教訓，有出金。但到有一次連輸，先發現輸係會令資金縮水，落大手數亦要多啲free margin，而且隨住手數加倍，所需要嘅free margin係幾何級上升，實際的N可能會比你計算的細好多，你未recover，已經margin call咗。

當時為咗唔好輸，做咗最危險嘅動作：再入咗金落去頂，希望下一轉可以recover返。好彩真係recover到，即刻拎返額外入落嘅錢，執返身彩。

但你都知，有得一次就有第二次，而且唔會次次都咁好彩，最終都係輸咗鑊勁。

呢度呼應返第一篇，係，最多只係輸你入落去的金額，broker真係會停你個account，唔會俾你輸超過你入落的錢，唔會嚟追你數。但問題係，broker擋唔住你嘅不理智，你會自己入多啲金落去送死。

輸咗鑊勁，但係仲係唔死心，仲覺得馬丁嘅問題只係注碼加得太大，不信邪又去試網格同ping pong。

網格策略係預先設定好多個價位，雙向網格係兩邊都開，升有升嘅格賺錢，跌有跌嘅格賺錢，靠價格波動逐格收割差價，唔係互相對沖。單向網格就係由EA判斷方向，我當年用嘅係單向。Ping pong係反向對沖，開咗一個輸緊嘅倉，再開個相反方向嘅倉去鎖住虧損，理論上唔會再輸多，但虧損係鎖死咗唔係消失咗，最終都係要平倉面對。

結果係一樣，初頭順利，最終都係仆街。其實本質都係一樣，都係用加注或者對沖去逃避止損，只係包裝唔同。

輸咗呢幾舖，低沉咗一段時間。慶幸當時有份穩定嘅工，唔會輸到瞓街，又唔會無飯開。諗返起入坑時睇嘅書，其中一個point就係只投入自己輸得起嘅錢，如果生活費都唔夠，就儲下先開始。今次輸嘅金額比自己輸得起嘅多少少，唔係多好多，仲可以繼續生存到。

仲有，黑天鵝事件係會發生嘅，即使數學上機率幾低，都總會遇到，只要生存夠耐就會遇到。馬丁、網格、ping pong等類似加注嘅策略，都要避開。

條路自己揀，輸左唔好喊。大家一齊跑落去。下次再見。