交易長跑 — 第三篇：第一次用真錢，同我第一個EA

上一篇講到，學咗一輪指標，試過唔同嘅組合，但back test好難做，人手碌張圖，好易錯，好易miss。

不過講返頭先，喺開始研究EA之前，我終於開咗個真錢帳戶。

開真錢帳戶

Demo account用咗一段時間，有幾日竟然賺咗20%。

但係心諗：demo賺咗都係假，唔係賺緊真錢，明明係賺，但實際上乜都無，係錯失咗機會。

仲睇過一段YouTube，有人講，用demo練習，練極都唔會同真錢一樣。因為冇壓力，輸贏對自己冇任何影響，根本練唔到面對真錢時嘅心理狀態。聽完覺得有道理，2018年尾就決定開個真錢帳戶，100美金入場。

黃金升勢，Lucky money

啱啱入場，就遇上黃金升勢，好快賺咗大約200美金，本金差唔多翻咗番。當時覺得自己已經搵到成功之道，信心大增。但係唔係憑實力贏返嚟嘅錢，會憑實力輸返出去。

當時覺得自己已經搵到成功之道，信心大增。

但係世事唔會咁順暢，咁順暢就唔會係度寫緊文章。大家可能都聽過，交易初頭賺咗啲lucky money，好快就會輸返落去。我亦都係一樣。

印象係當時黃金升得太瘋癲，我覺得一定會回調，於是竟然主力做沽，成日睇到RSI去到超買區就沽。跟住就GG了。

輸完lucky money之後，又再輸多幾個微型account。反思自己手炒嘅問題，都係犯住同樣嘅錯誤，呢幾次失敗令我學到三樣嘢。

第一，RSI喺極端市場會鈍化。個市可以係超買區維持好耐，你沽一次輸，再沽再輸，以為下一次啱，但係個市就係唔跌。RSI係工具，唔係神。

第二，賺咗要出金。唔好諗住一直唔出金，滾大個本先算。賺過嘅錢，係帳面上存在過，但唔出金，隨時輸返落去，就好似從來冇賺過咁。呢個教訓，我係之後好多次都係咁學番嚟。

第三，太短期嘅結果，唔代表咩。賺咗幾日，唔代表你已經搵到答案。輸咗幾日，亦唔代表你嘅方法一定錯。但係當時我唔明，賺咗就以為自己得，輸咗就急住再入金繼續試。問題係，如果冇搵到根本原因，冇認真改變過啲咩，就急住再入金，其實係重複緊同一個錯誤。正正就係上一篇講嘅，輸咗大比例好難追返，喺問題未解決之前繼續入金，只係繼續輸，仲輸多。

就係咁，開始諗，係咪可以寫個EA，用程式代替人手？

學MQL5，寫第一個EA

當時用MT5，所以去學MQL5。睇MQL5官網，加埋其他人分享嘅文章，慢慢摸索。好彩自己有少少programming底，用咗幾個月就掌握到基本。

第一個EA，寫嘅係最簡單嘅突破策略：突破最近20支K線嘅high或low就買入或賣出，固定TP同SL。寫完就做back test。

Debug：發現自己唔知自己唔知

但係back test出現0交易，完全唔落單。Debug咗好耐，最終發現，用黎計突破嘅20支K線high/low，包埋咗最新嗰支仲未完結嘅K線。咁即係個突破條件永遠達唔到，因為個price本身就係最新K線嘅一部分。Fix完，再做back test，結果係賺，當時好開心，以為終於搵到方向。

但係睇真啲，兩年成萬個交易，明顯係有問題。再查，發現第二個bug：EA無限制同時間hold幾多個position，仲係每tick落單，而唔係每支K線完結先落單。即係個EA係瘋狂落單，back test嗰個賺錢嘅結果，根本係假嘅。當年唔知咩事，搞咗好耐先debug到。

呢兩個bug，如果唔係自己寫EA，可能永遠唔會遇到，亦唔會諗到。

寫EA係一個好好的思考過程

寫EA有一樣嘢好有價值，就係迫你將交易邏輯清晰表述。

人眼睇圖，好多時係靠感覺、靠經驗，唔需要解釋得清清楚楚。但係寫EA，你要將每一個條件清楚定義，電腦先明。例如你想做trend following，就要定義咩叫trend，咩叫無trend，要客觀表述到，先寫得落code。呢個過程，係一個好好嘅思考練習，對理解自己嘅交易邏輯好有幫助。

但係寫EA都有佢嘅限制，有啲嘢人眼可以做到，EA做唔到。

舉個例子，人眼搵阻力位，可能一眼睇到200支K線之前嘅一個重要高位。但係EA需要設定lookback period，例如check最近100支K線嘅最高swing high，咁就有可能miss咗200支K線之前嗰個位。

仲有另一個情況。人眼會自動忽略細小嘅swing high，例如上升途中嘅小回調，我地會自然當佢唔係阻力。但係EA只要符合條件，例如swing high係三支K線組合，中間嗰支high比兩邊高，就會認到，就會當係阻力位。

所以人眼睇圖同EA，各有各嘅好處同限制，唔係話邊個一定好，要自己衡量。

不過有一樣，EA係100%跟足你定嘅rules執行，唔會有人為錯誤，唔會因為情緒影響決定。如果你嘅rules係對嘅，EA係好可靠嘅執行工具。關鍵係，rules要先係對嘅。

但係有一樣嘢要留意。EA係跟rules執行，但係控制個EA嘅係人。

舉個例子，回測結果係好，但live run連輸幾次，唔一定係個EA或者策略出咗問題，可能只係正常嘅drawdown。但係人嘅信心唔夠，就會停咗個EA，或者急住改個EA。結果呢，就係情緒影響咗決定，可能miss咗之後嘅連勝，白白放棄咗一個本來係好嘅策略。

所以就算係用EA auto trade，人嘅心態同情緒都係好緊要。唔好誤會用咗EA就冇壓力，就唔需要理心理質素。人喺loop入面，壓力係一直都係度。

條路自己揀，輸左唔好喊。大家一齊跑落去。下次再見。