特別的人 - 方大同

我記得係3月第一個星期六嘅午後，我喺客廳碌電話，突然工作群傳來一張截圖，係方大同嘅死訊。我第一下係覺得好有可能係fake news，畢竟誤傳死訊嘅事已經見慣不怪，於是乎我即刻fact check。

一打開微博，見到已經上熱搜，然後發現消息係由佢公司官方賬號發佈，基本已經證實。當下係悵然若失？我唔知點形容，就係一個好耐冇見冇聯絡嘅舊朋友突然傳來消息，點知已經係死訊，以後都無法再聽到佢任何最新嘅消息。

消息帶我回到第一次聽方大同嘅時候。應該係初中，由當時嘅室友推薦，聽到了《Nothing‘s Gonna Change My Love for You》，好多年後我先知道佢唔係原唱，呢張翻唱專輯包括《紅豆》《記得》我都聽咗好耐。思緒繼續蔓延，中學時期還未盛行智能手機同藍牙耳機，仲係一人一邊耳機同室友分享MP3/4入邊嘅歌同電影嘅時代，仲會偷偷喺被窩內睇小說同啲不可告人嘅秘密，專屬於青春期嘅秘密。我諗我應該係掛住嗰個朋友，同時掛住當時嘅自己，不過我冇text佢，好耐都冇聯絡啦，知道大家安好就好，人生軌跡早就唔同，好多嘢其實唔同咗。

嗰個下午我狂loop方大同嘅歌，流咗眼淚，與此同時社交媒體有好多關於佢嘅片段彈出，原來那些年我錯過咗好多。關於方大同，我可能只係識嗰幾首熱門歌曲，甚至仲喺前段時間聽完《才二十三》後覺得難聽，因為有破音走音，首歌都唔係特別好聽......但就突然間好想好好了解呢個人，好想知道我錯過嘅呢段時間佢經歷咗啲咩，點解會咁嘅？點解會咁快就走咗嘅？

之後好長一段時間我返放工都狂聽佢啲歌，無論係以前聽過嘅未聽過嘅，社交媒體繼續如潮水般湧出好多好多關於佢嘅事，我好似先真正開始了解呢個人。直到琴晚，見到盧廣仲翻唱，眼淚都有點氾濫。最近有聽到身邊朋友嘅朋友猝死嘅消息，再度感歎人生無常，但我相信總有人記得佢哋嘅好，以及好好保存佢哋留低嘅所有。

“When there’s no one left in the living world who remembers you, you disappear from this world. We call it the final death.”

之所以想記錄低，係因為隨著年歲漸長，要不斷同好多人事告別，或是生離或是死別，仍在不斷學習和習慣中。難就難在，你可能會喺某個時刻突然想念佢，或因為某啲嘢觸動到某條神經然後回憶湧現，但就已成過往。

謝謝青春裡有過方大同。