你知道粵語係一門咁樣嘅語言嗎？

廣東話其實係一門好獨特嘅語言，歌曲填詞有所謂協音（啱音），而其他語言係冇嘅。冇聲調之分嘅語言固然冇協音，就算以聲調分辨意思嘅語言，例如普通話、越南語、老撾語、泰語、藏語、緬甸語等等都冇協音。

因為例如普通話同泰語各聲調都有唔同嘅音高變化，普通話四聲就係水平、上升、先升後降、下降，又例如越南語同老撾語嘅聲調唔單只同音高有關，同發音時長、韻母發音亦有關。唯獨廣東話非入聲有四個都係水平調，入聲更係全部三個都係水平調，基本上廣東話唔同音高就唔同意思。 粵語（廣東話）嘅聲調簡單，要靠一粒音與相鄰另一粒音之間嘅音高差異分辨講緊乜嘢字，而呢啲音高有高有低，組合起嚟就係旋律。咁就係所謂粵語（廣東話）內建旋律。香港網民常講嘅「有聲post」亦係粵語較易感受出而咁樣嚟。

因為咁，廣東話係一門詞曲合一嘅語言。廣東話有九個聲調，有明顯嘅音階分別。音階粗分有四個，細分有六個。字與字嘅音階變化必需配合樂曲，否則會走音、刺耳、各種問題。九聲有三個是入聲，是短促音，用音樂講法三個入聲嘅唱名係與非入聲嘅調值相同，亦即音階相同，所以九個聲調細分係六個音階。

我會咁樣介紹粵語：粵語係一門有入聲、有協音（啱音）現象、冇介母嘅語言。有入聲：粵語有六種收音方式。冇介母：粵音每粒音嘅時長較相等。協音：粵語嘅聲調簡單，冇先降後升或先升後降等複雜聲調，要靠字與字間嘅相對音高分辦字，因而歌詞內建旋律，必須符合曲嘅旋律，詞曲合一。

講多一次。粵語九個聲調有七個都係水平調，即係當中七個根本變化一樣，而剩返兩個都係咁，只係上升少少嘅上升調，又係變化一樣一模，唯一分辨呢堆聲調嘅係音高嘅高低，即係音階，形成音階辨字嘅特質，其他語言係冇呢種特質。

粵語平常講嘢就要用六個音做旋律變化先得，無可避免詞曲合一。

亦可以咁講，任何語言都可以做到詞曲合一，但除咗廣東話，其他語言平常講嘢詞曲合一係冇辨義功能，亦陰陽怪氣。