【集誌社】宏福苑火災半年｜爺爺、嫲嫲、半歲 B 女梓甄罹難 夫婦悲慟互扶持 銘記三亡者生命
（原文刊載於集誌社）
何先生第二次上樓執拾後，臨行前在宏昌閣 26 樓的老家門口，放下兩束花，獻給雙親。他為單位內的嬰兒床鋪好睡墊，擺好兩紮迷小花束，獻給愛女。落樓時，當行經自己居住的 21 樓，他停下來喊出一聲：「阿爸、阿媽，走喇！跟我哋行喇！」
「以前我係一定唔會（受訪），但𠵱家諗法有啲唔同咗⋯⋯唔想佢哋變咗一堆數字」。
宏福苑大火至少 168 位罹難者當中，包括何先生的三位親人：他的父母和六個月大的女兒。半年以來，他與太太承受着走過失去摯親的悲慟，兩夫婦互相扶持。未來，他不願在傷心地原址安置，亦不打算再上樓執拾。最後一次踏進宏福苑家門，他道出三位摯愛的生命軌跡，讓回憶長留世上。
傷痛沒有隨告別家園而消減，何先生說：「我好想同阿囡講，對唔住呀，爸爸冇保護好你，你原諒爸爸，希望你可以係天國，陪住嫲嫲、爺爺！」他還想對三位逝去的家人說：「我哋日後天國見」。
何先生的雙親與愛女在宏福苑大火中罹難，圖為他與太太、愛女居住的宏昌閣 21 樓單位。
何先生父母居住的宏昌閣 26 樓單位中，擺放了一張愛女的嬰兒床，他擺好兩紮迷小花束，獻給愛女。
大火發生後，何先生在廣福社區會堂中，認出三位親人的遺體照片。事發時，嫲嫲抱著孫女跑到 21 樓同層鄰居單位暫避，最終他被告知在單位發現兩人的遺體。四月下旬，何先生首次上樓執拾，走到單位門前，怔住腳步，「開頭以為忍得住，一去到，企喺嗰個門口，已經係忍唔住」。
40 多年以來，何先生每次踏進家門，總是回到心之所在。小時候與父母居於荔景，直到他兩歲，雙親成功抽得宏福苑，胞弟亦隨之出生，一家四口在宏昌閣 26 樓建立小天地。「嗰陣時細個其實屋企附近無乜嘢，未有元州仔公園、未有海濱公園，甚至乎我爸爸媽媽屋企個廳望出去，都淨係得火車位，連下面個公園都無」。
屋苑設施雖簡單，對何先生來說，那是無憂無慮的年歲，「細個就係玩下面個毛毛蟲（攀爬架）、好高嘅鐵皮瀡滑梯，焫屁股嗰隻！」他的日常，是走到富善邨上學，閒時與母親踩單車，踩著踩著，見證屋苑變成萬家燈火。
何先生與父母居住宏昌閣 40 多年，長大後亦購置同幢另一單位，單位多個方向均能欣賞到海景。
慈母與嚴父
家之所以心安，因為有人，尤其是街坊萬千寵愛的何媽媽。「媽媽係『無得頂』，我真係從來都無聽過有人講話阿媽唔好，從來都無。細個鍾意食咩就煮乜嘢，當然屋企唔係話好有錢，但都會盡量滿足我哋，同埋阿媽係無所謂，最緊要我哋OK，佢自己乜嘢都無所謂」。
爸爸是位嚴父，何先生對爸爸的印象正是「好惡」，「我哋讀書唔係特別好，佢揸的士無乜點讀過書，對我哋好嚴，唔想我哋學壞」。不過，這位嚴父在外四海之內皆兄弟，是義字當頭的好朋友。何爸爸是基督徒，在團契中總成為焦點，更創立羽毛球會，「佢好多好多朋友，去到邊度都係主角」。
兩老愛做義工「幫多啲人」
雙親管教方式有異，但共通的是，兩人一生都選擇善良。兒子長大成人，兩口子退休後的生活，變成忙於到醫院、志蓮淨苑等地做義工，時常致電慰問醫院病人、提醒對方覆診，更會助養兒童，「佢哋好緊張義工，爸爸媽媽都係想行呢條路，幫多啲人」。
除了為義工工作奔走，兩老每年出走數次，挽手走遍世界，「佢哋去旅行係多到，我都唔知有邊啲地方國家，佢哋去過嘅地方就唔想再去，唔會係咁去日本、係咁去韓國，所以佢哋係不停去」。
何爸爸熱愛閱讀，家中藏書涵蓋宗教、政治範疇，部分書籍有他閱後擺放的書籤，時間從此停留在未讀完的那一頁上。
「天天」歡欣
何先生 2017 年結婚後曾搬到大圍，住上數年後，因有生小朋友的打算，為方便雙親幫忙照顧，自己亦心繫宏福苑，其後曾回到宏新閣租住一年，「事實係都鍾意呢個地方，你樓下一落樓，轉個彎就係公園，如果你喺九龍區，除非要好貴嘅樓先會有咁樣嘅環境。我自己除咗可以帶小朋友去玩，又有爸爸媽媽可以照顧，所以係完美嘅」。2022 年，他經地產經紀得知，父母所住的宏昌閣亦有其他單位放售，於是購入同幢 21 樓單位，與雙親距離更近。
2025 年，家門對何先生更添一層意義，全因愛女梓甄的出現。何太以中藥、針灸等方式調理身子，靜候一場命中注定的緣份，令她遇上梓甄。何先生愛叫女兒做「豬仔甜」，「叫叫下變咗豬仔添⋯⋯添添添咁，之後就叫左佢做天天」。
何大說：「天天出世之後，帶咗好多獨一無二嘅快樂記憶畀我哋，係我哋屋企嘅黃金記憶球嚟」。
這個花名正與她甜美而樂天有關，「阿 B 好開心，成日笑，每次返屋企，阿媽又好、老婆又好，一行埋去見到佢，佢就不停跳、不停笑」。何先生不時會抱著愛女，一同觀賞太太和自己的合照，每當他指著一幅兩人在櫻花樹下的合影，梓甄總是合不攏嘴。她時而調皮，尤其心儀一個大象毛公仔，經常扯著「大象」鼻子跳跳紮。這些都是何先生每晚踏入家門，最愛看到的一幀幀畫面。
「佢個樣幾乎每一日都好唔同，好估唔到，嗰個開心係講唔到⋯⋯以前收工有嘢做就做埋先，（梓甄出生後）總之一放工就返去㗎喇，一返去就衝入去搵佢」。
何先生單位損毀嚴重，但仍發現嬰兒用的清潔濕紙巾。
「啲煙入到嚟喇，走唔到喇」
去年 11 月 26 日，何先生衝回家的心情，忐忑焦急。由於梓甄僅六個月大，何先生家中安裝監控鏡頭，方便留意愛女情況。宏昌閣是先開展大維修工程的一幢，當時窗戶已移除發泡膠。當天何太打開一看，雖然拉上窗簾，但仍發現窗外呈紅色，不過未見濃煙。何先生馬上致電媽媽，「佢話大煙，走廊都有煙，走咗去鄰居單位度避，話搭唔到𨋢，應該喺度避」。他亦曾嘗試聯絡 26 樓的爸爸，但無人接聽。
何先生馬上跳上計程車回家，沿途發現仍未有相關新聞，看不到大廈情況，直至車子轉入吐露港，他親眼目睹家園被濃煙包圍，「火睇上去係無乜，但好大煙，已經係即刻失控喺架的士，喊晒」。他跑到停車場外，火焰在大廈低層陸續燒得轟烈，於是再次聯絡何媽媽，亦成最後一次與她通話。
「聽到佢已經好驚㗎喇，佢話『啲煙入到嚟喇，走唔到喇』」。
在上樓執拾期間，何先生大汗淋漓地尋找愛女出生時的金手鈪。
何先生嘗試以燒烤網篩走灰燼，惟最終金鈪遍尋不獲。
回帶災場情景 「阿媽嗰陣時會好自責，定係點呢？」
「我諗，如果阿媽無走到落嚟，都知道⋯⋯有心理準備喇」。何先生與太太四出尋人，連夜跑到新界、九龍所有醫院，查詢家人下落；太太以社交媒體發文，並向傳媒求助仍不果。最終，她收到友人轉發疑似消防訊息「2101 1BB，1成人，全冇生命跡象」，及後在廣福社區會堂中認出遺體相片。
噩耗當前，兩夫婦只能互相支撐。兩人事後不時默默流淚，「沖涼自己一個人喊、臨瞓前又喊，大家有講過唔好忍，要喊出嚟」。有時候，何先生仍會想起媽媽抱著梓甄，在濃煙下瑟縮的一幕。他會想起，父親趕離 26 樓單位，卻未趕及會合母親的遺憾。「我好擔心阿媽嗰下⋯⋯佢咁快已經無聽電話，即係一早已經焗暈咗，我會諗，阿媽嗰陣時會好自責，定係點呢」。
何先生不時會回帶意外一刻，幻想雙親及愛女在濃煙下瑟縮的情景。
買蛋糕紀念愛女一歲生日：「唔想唔記得咗佢」
事發至今，何先生與太太以各種方法，銘記三人的生命。上月上樓時，他尋回父親羽毛球會會衫，以及母親最愛穿的螢光粉紅風褸，留住他們的生命痕跡。在安息禮上，何先生向父母寫下告別心聲：「老豆阿媽，今世可以做到你哋個仔，係我最大嘅福氣。希望喺天國度，你哋可以一直相伴、幫我照顧到梓甄，安享寧靜。」對於女兒，何先生說：「我好想同阿囡講，對唔住呀，爸爸，冇保護好你，你原諒爸爸，希望你可以係天國，陪住嫲嫲、爺爺！」他還想對三位逝去的家人說：「我哋日後天國見」。
何先生在上樓前準備了多紮花束，獻給雙親和愛女。
何先生在上樓前準備了多紮花束，獻給雙親和愛女。
意外發生後五個月，踏入梓甄的一歲生日，何先生與太太準備一個蛋糕，靜靜地在家紀念，「唔想唔記得咗佢，唔想就咁唔記得咗佢」。與梓甄的連結，何太一生惦念，「我彷彿仲覺得阿 B 明明仲喺我個肚裡面，我多麼多麼希望時光可以倒流，如果思念嘅盡頭係重逢就好嘞⋯⋯」
「好多人都同我講叫我堅強，或者讚我好堅強。如果堅強可以令成件事返番轉頭，我寧願自己變成鋼鐵森林、或者有一副盔甲，令佢哋唔好受傷。而可惜事實係，我連自己個女都救唔到，我救唔到佢哋」。
半年過去，何先生踏出家門，盡力生活，「無得返轉頭，都要面對」。他最希望為三人討回的，是一句說話，「總之希望查到真相，有人出嚟承擔責任，有人出嚟交代、道歉」。何太說：「我唔想我屋企三條人命係枉死」。
何先生希望說出三人的生命軌跡，是紀念，也是為他們討回公道之路的開端。