<枯城>

<枯城>

我捕捉咗一片穿窿嘅枯葉，買完貓用品返屋企途中，就嚟到喇。佢就死釘喺轉角，轉右行前兩步，就係樓下大門。地下嗰間係昭和風格嘅冰室，冇限時，成堆人未開舖已經喺度排隊朝聖，所以間舖門口總會有人避雨、食煙。成日都冇乜好面色，催人走開。

返頭睇塊枯葉，行到街口就留意咗，條行人路掃到清吉，佢就攤咗喺度，顯得突兀。或者稱作空曠都錯咗，闊度只係1.2M側邊跟住泊低輛車，人來人往，襯托出塊枯葉嘅寧靜，景深就咁拉開咗。遇見，有啲興奮，好耐都冇喺正常嘅常軌行過路，過往幾年兜圈嗰陣對光影瞬間嘅敏銳一早就格式化，連維持咗好耐嘅插花興趣都停埋，手機相簿成日吉窟窟，得閒先影下隻貓搞笑嘅樣，仲未再留心望實呢個世界。於是，開心。

做緊正經嘢，算不上咩大件事，偏偏返嚟嗰陣，狼狽行到街口睇見你依舊。顧唔到自己有幾論盡，即刻蹲低執少少個角度，成個人差點貼埋地咁湊以往去，影低咗呢份乾枯，好似佐證埋自己仲活生生、同呢個世界依舊黐住。 諗住，你已了無生機、暗沉沉，更何況散發乜嘢誘人香氣，點解，好有吸引力？話唔定係嗰啲嗍乾完晒嘅乾噌噌，硬崩崩又易碎；表面嘅紋理冇多餘色彩，望落去好清晰，直頭好似開刀縫合後嘅疤，嗰個醫生嘅雙手，翩翩起舞；又好似湍急嘅流水嘩喇喇咁衝刷出嚟嘅河道，而我化成一粒微塵，驚嘆你呢幅好似雕刻出嚟嘅宏大結構；或者你根本係嗰個黑擸擸嘅山窿擘大個口，等我入去同山魔碰頭。

但係，我諗，應該係嗰份理直氣壯嘅不可一世令人著迷。你嘅成班老友喺院子度暱埋一堆，得你偏偏掛住外邊、探個頭出嚟偷睇呢度嘅風景，飛過圍牆，當係嗰種為咗自由寧死不屈嘅壯烈。喺你生命盡頭嘅行進軌跡裡，到底觀察到咗乜嘢？黑雨烈日、昆蟲鳥鳴，定係跟風浪下浪下嘅棉絮？可能半途畀人亂咁用鞋頭踢咗幾腳，又畀邊個冇心嘅物理外力郁動到嚟呢度。總之我睇見你嗰陣都已經遲咗，無望過你搖曳生輝；莫非見你正好？如果你仍舊掛喺嗰樖樹上，我大抵都係咁上下，懶理咁多囉。
街角。鏡頭失焦，景深，拉長。