宏福苑火災｜八旬雙親葬火海 父遺骸碳化、母「失蹤」逾月靠牙齒證身份 「政府責無旁貸」
文｜集誌社記者
「呢個係我幻想佢哋，因為佢哋好恩愛，應該唔會分開，咁應該佢哋係相擁一齊離開。」宏福苑火災死者「頭七」，蘇生蘇太到廣福社區會堂辨認遺體相片，得悉在八旬父母的宏昌閣單位找到一具遺骸後，接受訪問時痛哭。
大火奪走最少 168 條人命，火災發生近兩個月，他們接受《集誌社》訪問，憶述與母親的最後通話。雙親命喪火海，蘇老先生被燒到碳化，只餘頭顱和軀幹，透過 DNA 確認身分；蘇老太太只餘碎骨和牙齒，直至今年 1 月初才憑牙齒確認身分，是新增七名遇難者的其中一人。「唔係好敢相信，點解會變咗咁嘅樣，你諗到佢當時嗰個痛苦。」
回想父母曾出席業主大會反對維修方案、眾多居民提出消防隱患，卻無阻悲劇，「畀成廿萬維修嚟燒死自己，係好荒謬嘅事情」。夫婦盼可徹查事件真相，「攞唔到個公義，我爸爸媽媽就係枉死」；同時盼能原址重建，「宏福苑係我哋嘅根，我哋嘅回憶，全部都喺哂度。」最近閉眼，蘇生還是浮現父母遺骸的畫面，苦痛不會輕易消失，他希望能「記錄低每個人嘅故事。」
母親最後通話：「哎呀，今次死喇」
屆 84 歲和 83 歲之齡的蘇老先生和蘇老太，居於最先起火的宏昌閣高層。蘇先生憶述和母親的最後通話，火災當天下午 3 時 07 分，母親來電說「阿仔，我哋呢度火燭呀，我而家落樓逃生喇」，他說「記得攞濕毛巾」，母親回應「有呀，有攞」；過了約十多秒，母親再低聲說「哎呀，今次死喇」，之後便再沒回音。
身處公司的他望出窗外，看到宏昌閣冒煙，「我心諗死喇，今次大鑊」，立刻駕車回家，十分鐘內趕至屋苑，宏昌閣大堂入口已火光熊熊，火勢「燒到上頂」，波及父母高層單位，蘇生無從靠近。五旬的蘇先生和妻子居於同一屋苑的宏志閣，當時蘇太正在單位內，安撫兩隻驚慌亂竄的貓，束手無策的蘇先生，唯有先上樓帶太太及貓逃生，落樓後在外圍看着陷火海的宏昌閣，崩潰向消防求救。
蘇先生說，與母親的通話訊號一直沒斷，但「我係咁嗌佢都冇回應」，只聽到背景疑有人咳嗽，亦有東西焚燒的霹靂啪啦聲，直至近兩小時才斷線；蘇太不斷致電蘇老先生則無人接聽。
蘇先生事後得知，同層鄰居在 3 時許開門已發現濃煙密佈，將鄰居拉入屋躲避，兩人在火災翌日早上獲救。他相信父母當時一開門，應該同樣因煙霧瀰漫而未能逃生，「當時未知咁樣嘅情形之下，自己覺得好自責，係咪叫佢唔好落樓好啲呢？成日驚自己係咪做漏咗啲嘢而害咗佢，嗰種感覺係好強烈。」
父遺體被燒至碳化 幻想雙親相擁而終
當晚，兩人兩貓借宿親友家卻徹夜難眠，之後再返宏福苑搜索、又不停致電醫院尋人。因聽說有人被救、蘇先生初時仍懷有希望，網上整理失蹤人士資料的平台，更不時傳來有人見過父母的消息；有說在廣福邨，又有說在馮梁結中學、東昌街體育館⋯⋯每聞消息，兩人便立即趕至，每次卻撲空而回。
火災翌日起，夫婦每日抱着矛盾心情，到廣福社區會堂看照片認屍，「你都唔知係想認到好，定係唔認到好。」載有遺體照片的相簿，最初未見父母身影，卻認到不少以往會打招呼的街坊；遺體亦由最初狀態較完整，到之後越來越差，被燒至碳化。「如果我係咁樣，我都唔想人哋睇我呢個樣」——他們後來索性先看相片下方列出的位置、身分證等資料，與父母不吻合的直接跳過。
蘇太記得到第四、五天，發現一具身形像蘇老先生的遺體，但臉容已燒至難以辨認；他們透過蘇老先生相片，反覆比對耳珠、髮線，亦無法確認。直至 12 月 1 日，他們被告知在父母單位大廳找到一具遺體；翌日再看照片，眼前碳化的遺體不似人形、分不出頭和腳，「你都唔能夠叫話遺體，只能夠話係遺骸。」
蘇太說，當時覺得看到兩個盆骨像連在一塊，她問警員，恩愛的兩人，臨終時會否抱在一起？對方說不排除這個可能。夫婦聞言相擁痛哭，步出會堂後，蘇太向傳媒說出，相信兩人相擁離開的那番說話。
母親「失蹤」個多月 憑牙齒核實身分
未能單憑遺骸確認身分，蘇先生在提供 DNA 檢驗後一星期，獲告知核實到父親的身分，但仍未找到母親。那段時間，他幾乎隔天致電警方死傷者查詢熱線，追問母親 DNA 配對進度、甚至他會否可一同上樓搜索，「但佢哋好似冇資料咁樣，我每一次打去都要由頭講一次」；未找到母親的一個月來萬分煎熬，「你唔知道最終係咪搵得到、幾時搵到⋯真係搵唔到咁點算呢？」
直至 12 月底，警方問他們會否有蘇老太的牙科紀錄和相關資料，他們形容似出現一絲曙光，四出奔波找資料後，終在 1 月初獲通知，成功以牙齒核實母親身分。得知消息那一刻，蘇先生說「有少少放下咗心頭大石」，「好過你完全連個身份都冇埋，好過化咗灰、失咗蹤，你搵唔到就叫做失咗蹤。」
認屍見雙親最後一面：難受，你諗到佢當時嗰個痛苦
夫婦二人翌日到富山殮房認屍，明知雙親的遺體狀況不好，蘇先生還是選擇看了：「親人嚟㗎嘛，我都要面對佢囉我覺得，我想望到佢最後一眼。」隔着玻璃，母親只餘一盒碎骨、一副牙齒；父親則只餘頭顱及軀幹，已碳化的頭顱向後仰，呈現出痛苦、不正常的姿勢，與最初在社區會堂看到的照片不太相同。「難受啦，點解會變咗咁嘅樣，唔係好敢相信⋯你諗到佢當時嗰個痛苦。」
身處同一環境，雙親遺骸的狀態卻相差甚遠，法醫解釋因女性脂肪較多、燃燒性較高，會燒得較嚴重；至於父親的姿勢，是燃燒時肌肉收縮所致。「其實你見到個情形，真係好難接受到，一個人係會變成咁嘅樣⋯我希望佢係窒息咗先至被火燒。」夫婦希望雙親能土葬，亦盼遺體修復師能於喪禮呈現兩人較真實的模樣。
憶相處點滴 「下世可唔可以繼續做你哋個仔？」
蘇先生的回憶中，盡是兩老的點點滴滴。父親在他幼時在夜校教歷史、曾任導遊，會帶他到淺水灣游水、大埔滘摸蜆、參觀中文大學、又試過搭火車到北京；母親最初幫人託管小孩，後來與丈夫一起任保姆車司機，工作近二十年才退休。
作為家中獨子，他眼中的父親是好好先生，母親亦很關心和愛錫自己，「成日都驚我冇湯飲」；蘇太笑指丈夫是被寵壞的孩子，蘇老太經常為他準備喜歡的食物。他們形容，兩老很恩愛、不時拖手行街，「去到邊度都一齊」，蘇老先生換新電話時，會特意買同款手機贈予太太；數年前兩人「金婚」（註：結婚五十週年），亦主動提議設宴與親友一同慶祝。
大維修在兩年前開始後，兩老因環境嘈雜，不時搭車到處散心。蘇生蘇太每到周末，也不時駕車帶雙親四處遊玩，去年聽說彩虹邨清拆在即，亦特意帶在那裡成長的蘇老太重遊舊地。足跡遍及赤柱、澳門、龍蝦灣，雙親卻一直因腳痛、「行唔得耐」而推卻出國旅行計劃，終成了蘇先生的遺憾。「如果有下一世，都係佢個仔，真係好想同佢哋去環遊吓世界囉。」他說着，忍不住哭了。
「好多嘢都未同爹哋媽咪講、好多嘢都未同佢哋做」，蘇先生哽咽。「如果可以嘅，下世可唔可以繼續做你哋個仔？」
一個半月間消瘦、冒白髮 群組留言寄思念
個多月來，頻撲尋找雙親、申領安置援助，蘇生蘇太看着消瘦不少，也冒出了不少白髮。每當憶起兩老，兩人便潸然淚下，試過入睡後淚流滿面；在火場、看相認屍等瞬間，他們好幾次痛哭失聲。每逢思念雙親，他們便在家庭 WhatsApp 群組中發訊息，着父母不用擔心，他們會互相扶持、好好照顧自己。
災後一個月，夫婦不約而同在下午三時許，在群組發訊息說到想念兩老。蘇太的父親於疫情期間離世，平時稱呼老爺奶奶為「爹哋媽咪」的她，寫下如兩老見到她爸爸，要守望相助的短訊。老太太的遺骸，最終在蘇太父親死忌當日尋回，「我都釋懷咗，好似覺得我爸爸做到嘢，帶到佢哋返嚟。」
個多月來，蘇生蘇太消瘦不少、冒出了不少白髮。他們說最初一、兩星期，一天可能只吃一條蕉、一包梳打餅，；尋人同時又要處理兩個單位的安置、資助，也要預先為父母後事作準備，「其實你問我，我唔要啊啲資助，你畀返個爹地媽咪我啦。」
「畀成廿萬維修嚟燒死自己」
雙親突然離世，蘇先生坦言難以接受，「突然間咁樣兩個都一齊走咗，即係畀正常人都⋯⋯點接受到啫？仲要係，好話唔好聽，畀成廿萬維修嚟燒死自己，即係好荒謬嘅事情。」
蘇先生說父母明智，很早意識到法團壟斷多年的問題，他們一直有出席業主大會，亦經常叫兒媳無論如何要抽時間開會，「你唔開就少咗一個人去投票」。但他嘆，小業主的票數，終不及舊法團、民建聯黃碧嬌等人的授權票，對於宏業中標、要掏近 20 萬維修，各人既生氣又無奈。
維修初期，蘇太已擔心會有火災，曾考慮搬走，卻因供樓、難以負擔額外租樓開支而作罷。怕火燭、又驚有賊，她說幾乎每晚都睡不着，要在客廳做「看更」，直至天亮才能入睡；家住低層，她走樓梯時看到防火窗被換成木板感提心吊膽，曾向丈夫說：「如果一燒，好甘喎。」一家四口去年 10 月底晚飯時，兩老說起中環華懋大廈剛發生火警，「如果響我哋嗰度發生火警，我哋兩個死梗喇」，蘇太還叫兩人不要亂說，豈料一語成纖。
投訴不果 盼徹查、問責取公義
與許多居民一樣，蘇先生也曾向相關部門投訴，質疑工程以發泡膠封窗構成風險。「發泡膠，擺明會著火嘅嘢嚟喎」，他自行以窗前發泡膠測試，亦發覺屬可燃；但他引述消防處回覆指「我哋唔會處理呢啲嘢」，法團後來亦稱發泡膠有阻燃證書。「無奈囉，你可以點啫？⋯你監管嘅、你揸住公權力嘅機構，你唔去做呢一樣嘢，咁我哋小市民可以點樣？」
「我哋唔係冇投訴過，我地係全部投訴過晒，只不過係你哋唔受理而導致呢一個災難，咁你都可以冇人問責嘅？」蘇生逐一申訴，棚網不阻燃、警鐘沒響、走火梯木窗⋯⋯「政府只要有一個部門去處理一下，可能已經冇咁大件事，可能啲人就走得切⋯⋯係政府嘅不作為，而導致呢一次嘅災難。」
事發前一、兩星期，蘇生還記得到父母家飲湯，提到外牆的紙皮石已鋪好，「望到終點啦」。可惜等不到維修完結，宏福苑已被焚毀。大火為多個家庭帶來不可磨滅的烙印，蘇生盼可徹查事件、取回公義，「你攞唔到個公義，我爸爸媽媽就係枉死喇喎。」他說從網上片段看到，除宏昌閣外、宏建閣亦疑有火頭，希望查明事件真相，是否涉及人為蹤火，亦認為政府「責無旁貸」要「交人」。
「我希望真真正正可以徹查真相，追究相關人士，改善制度嘅不足」，這是蘇生的願望。「宏福苑只能示範一次，如果制度不改，犧牲咗嘅人、消毀咗嘅家園，就變得毫無價值。」不過他也承認前路難行，「你睇吓南丫海難，查唔查到乜嘢。」
視宏福苑為根 盼原址重建
蘇生蘇太痛失摯親，還要面對居住環境巨變。夫婦連同愛貓，災後不久便入住元朗的過渡性房屋，但兩隻由細玩到大的孖女貓咪，一度因環境、氣味改變，無法認出對方而打架，又因寒冷和受驚過度「第一次捐入我哋被竇」。
兩人不時掛心老家，有空便會返宏福苑察看、獻花予父母。看到從小到大成長的地方變成七棟被熏黑的大樓，蘇先生內心淌血。「宏福苑係我哋嘅根嚟，我哋啲思念、回憶，全部喺哂度。」
與不少街坊一樣，他們一家是宏福苑的首批住戶。蘇先生記得，搬來大埔時剛升讀初中，當時尚未有吐露港公路，每天要搭一個多小時車到九龍區上學；廣福公園當時只是一塊爛地，他會在那邊玩遙控車；也曾試過在吐露港公路差不多落成、尚未有車時，徒步走出公路。同屬大埔人的蘇太，自拍拖起已說要買宏福苑的向海單位，最終於 2010 年購入宏志閣單位，猶如夢想成真。他們很喜愛這個家，光猛、通風、冬暖夏涼，不時耳聞雀仔聲，更可遙望八仙嶺，甘願十多年不去旅行做「樓奴」。
「想記錄低每個人嘅故事」
災後的安置計劃未有定案，夫婦已感屢遭「二次傷害」。先是政府原本保證災民可免費入住過渡房屋，到後來推出租津、改為要交租；近日發問卷詢問災民對原址重建的意見，翌日財政司副司長卻公開表示選項不切實際，蘇先生嘆道：「你究竟要傷害我哋幾多次？」他們亦不滿，政府擬用市民捐款購買居民業權，又以低於市價的實用面積、而非買樓時的建築面積，計算收購價，等同居民要補貼才能購置相近的新居屋。
夫婦只盼望能原址重建，希望能獲原有樓層、座向、呎數的單位，「要等我都冇問題」。他們明白不同居民各有考慮，有些人期望快些安居，「冇問題，呢個係個人選擇，但係你政府絕對唔可以一刀切，一定要全部搬去邊度邊度。」
二人居住的宏志閣是唯一沒被大火波及的大廈，他們曾短暫返家取回舊物，但對何時正式解封毫無頭緒。夫妻計劃暫住過渡性房屋，先處理好雙親後事，好好照顧貓咪和自己的情緒，再思考前路。尋回母親後，蘇先生說有一點點釋懷，但最近閉眼，眼前還是會浮現出父母遺骸的畫面。苦痛不會輕易消失，但他選擇接受訪問一一說出，因為相信「每個家庭都有每個家庭的故事，我想有記錄低每個人嘅故事。」
