補習老師的抽屜

補習老師的抽屜 01：爸爸

上星期家長問我，仲有無時間幫埋妹妹補習，妹妹今年小一喇。

我話有。

其實我無。我自己有6個學生，由小二到中三，加埋自己3個小朋友，備課已經有啲攰。但最後都係為咗錢，接咗。

今晚兩兄妹一齊補，都幾好，因為同哥哥好熟。

教到生字「爸爸」。

妹妹忽然好細聲咁講：「我WhatsApp爸爸，搵爸爸，爸爸都無覆我。」

我未識反應，哥哥喺隔離即刻接住講：

「爸爸唔要我哋喇，delete咗佢WhatsApp喇！」

佢講到好似講緊今日食咩餸咁輕鬆，但…

我支筆停咗喺「爸爸」個「爸」字隔離，點咗一舊墨出嚟。我個鼻一酸，眼淚就出咗嚟。救命，我真係唔得呢啲。

我唯有扮鎮定咁講：「好喇，聽老師講。以後有咩都好，都可以WhatsApp老師，同我講，好唔好？繼續補習啦。」

哥哥望住我，一臉疑惑。

「老師，我唔覺得慘喎，你喊咩？我好憎我爸爸啫。」

嗰一刻，我見到屬於哥哥嘅嗰啲光，暗咗一下。

(待續)