📱💭《Dear Tech #02: Samsung，玩得咁大，承擔得起未？》

呢排本來諗住買部 Galaxy Fold 6 試下，畢竟摺芒對我嚟講係一個幾有趣嘅體驗。唔係主力機，純粹想玩吓，唔係「轉會」，只係想「開眼界」。

不過，一試就嚇一跳。

我搵緊二手機，發現市面有唔少 Fold 6 行貨、水貨都聲稱仲有保，但一問 IMEI，Samsung 嘅 Chatbot 又唔肯講、又唔肯查。你問佢買唔買到 Care+？答非所問。你問佢有冇保？叫你問賣家。

最後你發現，Samsung 成個保養制度就係想你放棄：要單、要保養證，樣樣唔齊就當你冇保。

講真，我公司同自己加埋買過超過十部小米、紅米，連粒塵都冇入過 Mon 裡面。Samsung 咁 Premium 嘅機，啲人話用幾個月已經爆線、出綠線，仲要拗保拗到你頭暈。

最經典嘅一幕：

我：請問呢部機仲有冇保？

Chatbot：請聯絡原本嘅購買地點。

我：我只想知道用唔用得 Care+。

Chatbot：請查詢當地支援服務。

我：⋯⋯

有冇搞錯？2025 年火星都準備移民，香港仲係「冇單唔保」？

對比返 Apple，人地揸住部機，全球一樣保，唔使單唔使盒。用家唔係要你送機送電，係想你有責任感。

Samsung 你個 QC 水平，我真係未玩已經驚出事。

我想試玩，唔代表我想試被玩