慘絕人寰！慘過坐監！

如果唔係香港人，或者未必知道呢個人物。佢係2018年同當時嘅女朋友潘曉穎去台灣旅行，點知無端端殺咗佢，重將屍體放入行李箱棄置，然後潛逃返香港。佢用佢女朋友嘅信用卡消費，被起訴洗黑錢，監禁好似唔夠一年。當時已知道佢殺咗人，但事情發生响台灣，香港沒有司法權，不能起訴。當時有提議，可以知會台灣司法機關，移送嫌疑犯。相信大家多少有啲印象，但據說，香港同台灣冇正式移交程序，（或者係，當時係有一條國與國之間嘅移交程序，但香港唔肯承認台灣係另一個國家，所以唔肯用呢個程序。）

然後，政府就攪修改移交罪犯條例，原本主要針對香港同台灣嘅特殊情況，但點知政府話順便包括埋大陸。一句可以將疑犯移送大陸，自然引起巨大反彈，於是，後來的，就是一頁可歌可泣嘅香港歷史啦！最後，逃犯條例沒有修改（撤回了嗎！），但香港就徹底改變咗！

陳同佳因洗黑錢罪刑滿出獄之日，由一位牧師接走，佢冇直言喺咪政府主使，而此後，再冇人見過陳同佳，只有這位牧師代言，發表一下，成日話佢自願去台灣自首，但係就冇正式（確）渠道。期間，台灣司法機關有提議過一些方法，但港府不接受。我哋啲普通市民，冇辦法明白佢哋想點？要人哋用「中華台北」司法機關嘅身份？本地一啲律師亦提出一啲意見，佢好人好姐，有手有腳，自己買張機票飛去台灣自首，有幾難？

由於當陣時全球疫情，大家各自封城，旅遊往來幾乎全部中止。到世界復常，佢又再提去自首嘅意願，但冇實際行動。大概係嗰時，大家先知佢原來住喺「深山」，等緊去台灣自首。代言人一直強調，陳同佳响香港喺「自由人」，先前犯咗法，但已經服刑期滿。咁點解又要唔比佢自由行動呢，據說，係為佢個人安全着想。因為佢咁樣大模廝樣周圍去，好易引起其他人憤怒，甚至動殺機喎！

呢啲嘢係呢個時勢真係冇人會理得咁多，所以咁多年嚟，冇媒體去問，安排係點，地方大細，有冇人照顧起居飲食，邊個負責金錢支持，其實大家都懶得理。如果唔係有條友三不五時出嚟講兩句，大家都唔記得有呢個人。突然，呢位牧師，唔係，而家已晉身立法會議員，出嚟話，原來已經過咗六年，仍然係無了期咁等落去，重講到佢幾慘幾慘咁，真係可以引起他人對佢嘅憎恨！每日淨係打機，食同瞓，你話幾痛苦？最新情況重話，佢連室外都唔可以去，直情慘過坐監！代言人重話，坐監嘅犯人，每日都有時間岀戶外活動，散吓步，但佢連呢啲都唔可以云云。

咪住，你又話佢係自由人，咁佢嘅人身自由係俾邊個禁制呢？已經話住到深山（野嶺），應該人影都冇，咁重驚啲乜？我諗最驚就係佢自己走去自首，而唔經佢哋定落嚟嘅程序！敢係咪自己自願嘅呢？咁樣無了期拘禁，真係慘過坐監。但係當局一定唔會俾佢自己出嚟向公眾回應，咁而家代言人放聲氣，係想有乜嘢效果呢？希望台灣當局見佢咁慘，網開一面，順應香港要求程序？成件事，死者係香港人，疑犯又係香港人，只係案件响台灣發生。佢哋做咗要做嘅嘢，但係又冇迫切性，亦冇輿論壓力，乜嘢俾殺人犯逍遙法外，或者要為受害人伸張正義，起碼，一般市民可能覺得，當事人都唔係台灣人，唔會特別群情洶湧吧？

換轉响香港，受害人媽媽搵議員幫忙，起初還會義忿填膺，開記者會，要替受害人攞個公道。結果，變成修改法案條例，攪得滿城風雨。現在，再冇人理會潘媽媽了，因此，响呢個時候，六週年（紀念）走岀來同大家講，陳生其實好鬼慘，算唔算係二次（甚至三番四次）傷害呢？而佢嘅慘況，係邊啲人做成呢？

你唔出聲，冇乜人會諗起。佢出嚟講，但係又冇解決方法，重要係度賣慘，真係睇到人眼火爆！倒不如你放生佢，等佢自生自滅，起碼都有機會自己揀點樣行，要承擔責任，都有機會行動，唔使無了期咁唔知等乜！