三章： 神秘富家女的前半生

Ay 一出生就係城市入面嘅「千金小姐」，屋企大到可以玩迷宮，廳大過一般人嘅一層樓，工人數目用「幾個」嚟計，煮飯一個、打掃一個、幫手執衫一個、門口仲企定個司機。有一次佢從朋友處得知緬甸有塊靚玉，佢就立刻派家中庸人專程飛去緬甸將那塊玉買回來。呢種隨時想買心頭好嘅行為，想点做就点做，唔需要考慮人力，物力和財力。在呢種環境長大嘅女仔，伸手有工人、出門有司機、講句說話就有人即刻跟住做，佢嘅人生本來就係「優等生劇本」。偏偏，人生就係鍾意同人玩嘢——十六、七歲嘅 Ay，青春少艾，不懂世事，而樣貌標緻，又係中日混血嗰種靚，加埋讀書成績好，個性精靈活潑，自然好多人追。佢一時衝動，行差踏錯，結果和一個出身名門望族嘅青年才俊搞大左個肚，懷上了Co。對方唔係坏人（他讀完書後就係香港非常出名嘅律師）佢哋兩個人年紀都太細，玩玩吓玩出事，完全諗唔到會咁大鑊。
兩邊嘅父母一聽到消息，成間屋差啲震散。老豆嬲到爆炸，老母喊到成個人都散晒，惟一要做嘅當然係：
「點先可以遮到呢件事？」
嗰個年代，未婚懷孕係天大罪，仲要係有錢、講面子嘅家族。
最後，Ay 點都保住個肚，唔肯打胎，話：「係我嘅錯，我會自己搞掂。」Ay咁大膽、咁倔強嘅性格，之後佢一世都冇變過。

Co 就係咁出世，而Co 一出世就係「媽媽嘅弱點」同「媽媽嘅心魔」
當Co 一出生，工人湧住嚟照顧，奶粉、衫、床、玩具全部用最好嘅，Ay 雖然年紀細，佢即刻變成另一個人， Ay 對 Co 嘅愛唔係一般媽媽嗰種溫柔，而係一種「代償式」嘅愛：
「我行差踏錯，你就要替我行返條贏家路。」
Co 愈大愈靚，Ay 就愈覺得：
「天主俾咗個禮物我，佢一定要嫁個最優秀嘅人。」
Ay 嘅內心其實好矛盾：
她怕 Co 重蹈覆轍，怕 Co 被看不起，怕 Co 的出身比人說三道四，但另一邊廂，她亦想證明俾世界睇——
「雖然我年少犯錯，但我個女有資格嫁入最好嘅家庭。」

Ay 在Co幾歲時就認識了A,後來還嫁咗比 A，繼而移民英國，但佢內心深處一直仲係嗰個十七歲被逼到牆角嘅女仔，心底永遠有條刺，所以佢對 Co 嘅婚姻「控制到盡」，近乎偏執。

Co 嘅性格形成：聰明、孝順、能受壓。
Co 係望住四五個工人長大，但 Ay 對佢要求極高：行唔可以太快、坐唔可以駝背、講嘢唔可以冇禮貌、見到長輩一定要叫得準準。
佢細細個已經聽住 Ay 講：「你一定要嫁個有頭有面嘅。」
「你係靚女，唔好浪費。」
「你要知，你唔係普通背景。」
「你以後一定要出人頭地。」
Co 係聰明女，但愈聽愈驚，就有壓力。
內心深處，Co 一直諗：
「我係咪真係只可以揀啲有名、有利嘅人先算好？」
「Ay咁辛苦湊大我，我唔聽佢話係咪好不孝？」
「但係我鍾意嘅人唔係佢想我嫁嗰啲人……」

而Ay為 Co 長大後鋪排嘅婚姻大計
Ay 嘅偏執 + Co 嘅孝順 = 悲劇慢慢發酵。
Ay 一家三口移民到英國後，所有食嘅，用嘅仍然係最好嘅，特別係培養Co嘅必然是絶頂好的。
搬到英國之後，雖然生活圈子細，但仍有與香港嘅名人圈子聯絡，活躍程度不減當年，醫生、專業人士、律師、開診所嘅、做工程師嘅，通通齊。
佢每次回港出席飯局都係抱住一個目的：「你哋個仔幾歲？有冇結婚？讀咩書？做咩工？」明查暗訪，篩選到最靚仔、有前途、有地位嗰幾個，再慢慢用「食飯啦、BBQ 啦、飲茶啦」帶 Co 出嚟見面。但 Co 對所有呢啲場面都冇感覺。佢一笑（禮貌）、一坐（斯文）、一講嘢（得體），樣樣都係「乖女模式」，但 Ay 每次見完飯局都嬲嬲哋：
「你點解對個醫生無反應嘅？」
「你唔好咁難搞好唔好？」
「個律師又高又靚，你都唔識珍惜？」
「你再揀下去，錯過就無啦！」
Co 每次都係溫柔咁回：「Ay，唔係唔好，只係我冇感覺……」
Ay 聽到「冇感覺」三個字就火都嚟。
佢覺得自己十七歲冇得揀，Co 而家竟然咁揀擇？
Ay 嘅心魔再度爆發。

Co 真正鍾意嘅人：E
Co 其實在讀中學時就已有了心上人，係 E，我老伴嘅細佬，表面上係 Co 嘅「堂叔」。
年紀相近、喺英國日日見面、大家講嘢自然、性格合拍，唔講都知會擦出火花。
E 冇錢、冇勢、冇靚背景，但係對 Co 真心、細心、穩陣、好到出汁。
Co 想嘅唔係豪門、唔係名利，佢想嘅只係一段平凡但安穩、真心但唔浮誇嘅愛情。
Ay 一知道即刻爆炸。
「你發咩神經呀！」
「E 連自己都照顧唔到，你嫁咗去會後悔！」
「你唔好癲啦，親戚點嫁？」
「你咁靚，點會揀到咁嘅人？」
Ay 甚至覺得俾 Co 嫁畀 E，就想起自己從前嘅「錯到入肉」。
佢接受唔到。
佢唔只反對，係死都唔肯接受嗰種。
Ay 再次帶 Co 返香港：逼婚大行動
Ay 覺得喺英國搞唔掂，
於是決定用最女人嘅招式：轉場作戰。
「返香港，開眼界，睇下咩叫真男人。」
冇錯，Ay 就係咁霸氣。
佢返香港嘅鋪排確誇張到極致：
年青時的相好已是響噹噹嘅大律師，派勞斯萊斯到機場接人，有一次仲係直升機。飯局一場接一場，律師、醫生、專業人士全部出場，啲姨媽姑姐仲話：「呢個靚女一定嫁得好。」但 Co 全程內心死氣沉沉。食飯只係任務，微笑只係裝飾，說話只係禮貌，完全唔係為愛情——一啲火花都冇。
Ay 每晚返酒店同佢「開訓導會」：
「你再唔嫁，真係冇人要你啦！」
「你返英國做乜？返去搵 E 嗰啲下等人？」
「你嘥晒自己條命，好唔抵！」
Co 聽到流眼淚，但冇反駁。佢已經攰到唔識點講。
---
Ay 逼婚的最終章：飛機擋門事件（Foreshadow）
最後 Co 撐唔住，堅決返英國。Ay 喺機場發生嘅事，係另一個故事，
但呢度要先埋下伏線：
Ay 竟然一度擋住機門，唔俾關門，成個場面驚天動地、全世界都震晒，但 Co 是坐在機上。
嗰一刻 Co 心入面好清楚：「我唔可以再活喺Ay的陰影下。」