蘋果案裁決｜前員工對裁決結果不感意外 「多謝佢創立蘋果」「希望仍在囚同事可獲釋」
文｜集誌社記者
橫跨五年、多度延期，終經歷超過 156 日審訊。前壹傳媒集團創辦人黎智英，被控兩項「串謀勾結外國勢力」、一項「串謀發布煽動刊物」，案件今早（15日）頒下裁決，黎智英被判三罪罪成。由 1995 年 6 月創立，黎智英旗下的《蘋果日報》，結業前曾是香港的暢銷報紙。於蘋果十多年、工作至最後一刻的黃小姐，今早也有到場旁聽。她向《集誌社》表示，對今次裁決感到平靜，「某程度上都真係，唔係做到啲乜嘢，希望個天仁慈啲，可唔可以唔好對佢咁殘忍呢？」
「都預料到個裁決結果係點樣㗎啦」
黎智英於 2020 年 8 月，被國安警拘捕，今次裁決是「串謀勾結外國勢力」首例。他在同年 12 月 30 日，被拒保釋，失去自由超過 1800 日。黃小姐說，審訊期間，不時到場旁聽，包括黎被捕後，案件首次提堂，但非每次都能進入正庭。
對於裁決，她表示無特別心情，「因為我諗個裁決，大家都會做最壞打算，都預料到個裁決結果係點樣㗎啦…我聽到佢話罪成，咁我真係冇乜嘢啲大嘅反應、感覺。」
但對於黎智英的作風，她評價說，「行事作風都好明顯，係堅持緊自己個信念、做緊自己認為應該做嘅嘢。」
前員工：曾在《蘋果》工作自豪
近來黎的女兒受訪指，黎智英身體狀況日漸惡化，今日裁決出爐後，多個人權組織都表示，黎應馬上獲釋。五年間出入法庭，黃小姐說，雖無法清楚記得黎智英上庭的每個時刻，也沒能細緻到觀看他手上指甲有否剝落，但可以肯定，「佢精神狀況OK ，特別係見到佢認識嘅人，係會精神啲、抖擻啲，咁但係同以前喺公司梗係唔同。」
「（但）大家都會擔心，但我哋其實又真係好似冇咩方法可以做到任何嘢囉咁，只能夠希望個天對佢好啲，希望佢平安啦…某程度上都真係，唔係做到啲乜嘢，希望個天仁慈啲，可唔可以唔好對佢咁殘忍呢？」
至於有甚麼說話想予黎智英，黃小姐說，「我哋員工嚟講，都好多謝黎生，佢創立咗呢個《蘋果日報》。我哋可以曾經喺蘋果日報做、工作啦，我相信好多喺《蘋果日報》做嘅同事，都覺得會好自豪。」
她續說：「嗰段時間，即係大家都好義無反顧咁去做新聞。其實嗰段時間辛苦得來開心嘅，咁𠵱家大家都希望，所有人都可以平平安安、健健康康。咁我當然都希望佢可以早日獲釋，而啲同事亦都希望其他仍在囚嘅同事都可以獲釋。」
「多謝佢創立蘋果」
另一位前員工同樣提到，已預計裁決結果，「但一諗到佢可能出唔返嚟，覺得好難過同痛心」，該前員工指，此案是香港新聞自由殞落的象徵，亦擔心日後會否有其他唔合政府心意的傳媒，會被安插同樣罪名。該員工又說，「多謝佢為香港付出、多謝佢創立蘋果，令我在好 green 時就體驗過自由地做新聞的感覺。」但他同時失去自由，「一千幾日、同埋日後唔知幾多個春秋，佢同佢家人所承受的折磨難以想像。」該前員工只望黎的家人平平安安、照顧好自己身心，帶著黎生的信念繼續好好生活。「我哋都會繼續行落去，直到見到光的一日。」
六高層同被控
黎智英自 2020 年 8 月被捕，並自同年 12 月起還押，一度申請保釋成功，律政司上訴至終審法院，他的保釋被拒。他也是案件七名被告中，唯一不認罪被告，其餘六人，包括壹傳媒行政總裁張劍虹、《蘋果日報》副社長陳沛敏、總編輯羅偉光、執行總編輯林文宗、英文版執行總編輯馮偉光及主筆楊清奇。
在《蘋果》工作七年的員工阿冬（化名）指，《蘋果》有不同版面、面向，絕非僅有庭上作供的涉案文章。在現行政治氣候下，他直言裁決結果變得「理所當然」。提起今日政府各部門紛紛表態支持裁決，他說，無論是判決、抑或庭外政府發言，無不在貶低《蘋果》多年來的建立，「咁多年大家做落嚟嘅故事…唔同版面嘅同事。 大家都做緊啲香港唔同嘅事 ，係唔係就咁樣（可以）解決一個傳媒？」
憶留守至最後一刻
《蘋果》在 2021 年 6 月 24 日發行最後一日的報紙後停刊。阿冬憶述，當時留守的同事，抱著每篇文章都是最後一篇的心態，戰戰兢兢、克盡職守，「就算最尾嗰晚，大家都係好努力去揼緊新聞，唔係『我哋都無啦，就執笠，由佢啦』，就算出嚟嗰篇文章得兩個鐘擺上網都好，我都想出咗佢。」今天仍有接觸傳媒工作，他不禁會想像，《蘋果》還在的日子，如何令業內更有競爭。
「預咗」 悲嘆
受訪前員工，無不提起對裁決的「預咗」、「理所當然」。 Jacky（化名）向《集誌社》提起，從 2020 年，黎智英經歷保釋，當時仍有種「係咪有得保釋？」的感覺，沒料被拒過程來得如此之快。
2021 年，管理層相繼被捕。回想一切，她沒法確認，自己想法從何時有變，但肯定是在四年間，層層疊加，包括見證前公司在《國安法》紅線下倒閉、公民社會收窄。「當局能夠咁高姿態咁樣拘捕，佢哋（蘋果日報）需要執笠，都唔會係一個樂觀嘅預期。」
裁決日情緒沒有太大波動，但自言性格悲觀的 Jacky 說，「詰問、悲嘆」，其實一直常在，但生活總要過。「我唔係淨係裁決嗰一刻，先突然問返『吓，點解啊？竟然係咁？』」若然這份情感能夠具象，她指，那可能是「放喺背脊孭住佢…可能肉眼上無咁明顯，但其實佢一定喺度，我覺得佢永遠都會喺度。」
當言語穿不過高牆 「活好自己生活，盡量唔好忘記」
與黃小姐相似，Jacky 不時旁聽。她形容，有某種責任陪伴，一來是曾經任職《壹傳媒》、《蘋果》，從個人層面，與自身職業、過去經歷、記憶、得著等等有關。另一原因，是作為香港人、讀者，需要感謝它帶給港人的報道、價值。「咁淨係呢兩樣嘢，都足夠令人有一種道德嘅責任，你會想去畀大家都，互相睇到大家。」
作為記者， Jacky 說，社會在變，同時不斷教你「點樣行落去」。每次改變，就是令你知道紅線織到哪裡，甚至無處不在。事實也證明，大家既在學、也學得快，「所以大家先收聲收得咁快。」
起初，她會受訪，分享對案件看法、想對被告說出的話語，但到裁決當天，她婉拒了。
「問題係，我講佢哋都唔會聽到。即係𠵱家嘅社會現況，你講乜你寫乜，其實你唔會進入到高牆，同埋你真正想講嘅嘢，你都唔會經過大氣電波講。」
她形容，這是香港的常態，也是眾人的恐懼。「咁浪漫化嘅問題，只能夠喺一個好安全嘅社會，先可以講到你想同佢講嘅嘢。」
「條路就一定係咁行落去，但係你又唔會生存唔到，只不過係好絕望同好悲觀，但呢個都係我已經預咗…都係一直帶住呢種悲觀同絕望咁樣行。」
「每人都係活好自己生活，同埋盡量唔好忘記。」
前採主：佢哋已喺裡面渡過好多個春夏秋冬
於《蘋果日報》任職超過 20 年的前採訪主任蔡元貴，今早花一小時，讀了十分一的判詞，暫無法評論。他指，今天「係一個階段嘅結束」，真正重要日子是判刑日，「幾時見得返係重要」，「屈指一算，佢哋已經喺裡面渡過五個生日、五個中秋、五個聖誕，嚟緊就第五個農曆新年，好多個春夏秋冬」。
喜欢我的作品吗？别忘了给予支持与赞赏，让我知道在创作的路上有你陪伴，一起延续这份热忱！