九龍城重建2｜啟華魚蛋 看淡前景 謝絕回遷 斥市建局「斷搶」 貼標語被兇或犯國安法
文｜集誌社記者
清晨時份，天還未全亮，位於南角道的「啟華魚蛋公司」已經運作。負責人細哥將冰鮮魚放進機器，起出魚肉，再將魚肉碎、調味料放進攪拌機，加入冰塊調節溫度。魚肉漿製成，再放進唧機唧出一粒粒魚蛋，浸至硬身後，放進大鐵鑊中油炸。
早上 8 時許，另一負責人成哥在附近放狗後抵達，待隔壁的咖啡店開門，便上前幫忙把餐牌搬出店外，滿足地呷一杯咖啡。登上寫有「啟華魚蛋批發」的客貨車，出發送貨，中午前返店，擔張椅子，坐在店門外與路過的街坊聊天，或與朋友在工場內打麻將。
這片南角道獨有的風景，將隨重建消失。隨衙前圍道及賈炳達道重建計劃收地展開，啟華魚蛋將於九月底最後一次開機做魚蛋、十月中光榮結業。面對重建，這名豪爽的大叔也流露不捨：「呢柞街坊，四十幾五十年，真係個感覺，係好似係兄弟姊妹咁⋯⋯大家嗰個感覺、嗰個友誼，喺邊度都攞唔返。」
五十年潮州魚蛋興衰
63 歲的成哥陳金成是潮州人，父親當年賣魚為生，七、八十年代工場生意最為興盛，成哥憶述當時街邊小販檔、小食店繁多，食物又沒那麼多花款，離不開豬皮魚蛋、生菜魚肉。那時早上五時多開舖，「啲人好似搶咁，驚死你冇貨畀佢」，有時需求太多，「起貨起唔切」，就會先給客戶部分，着他「晏啲再嚟攞」。整條街也不獨啟華於清晨時份運作，其他餐廳、士多、五金舖也在六、七點開店，很是熱鬧。
全盛時期，店舖內有十多個員工，分早更、夜更工作，輪流製作魚肉、炸魚蛋、魚片、白魚蛋——早更炸過魚蛋後，夜更會再翻熱，待送給客戶時「全部都係熱辣辣」，一日可以製造 7,000 至 8,000 斤貨，「真係唔停，做到你驚」。
2000 年後，面對內地貨競爭、本地漁獲減少，店舖的產量也下降，不再分早晚兩更，產品亦減至魚肉和炸魚蛋兩款、一日 1,000 至 2,000 斤貨。魚蛋早上製成後便放進雪房待送，「性質唔同晒喇」。
店內有一部當年以約 10 萬元從日本訂造的魚肉分離機，鮮魚放進去，便可分開魚肉和魚皮，成哥估計全港不超過四部。起出魚肉後，混合調味料放進攪拌機打成魚漿，並加入冰塊免過熱，其後以唧粒機唧出魚蛋，油炸、放涼後放入雪房。
看不到前景的投資
成哥憶述，三年前得悉要重建一刻，「一片空白，唔知諗咩好、唔知要點做」，腦裡冒出很多問題、也很緊張：「第時要點做呢？」大約一年後消化了重建一事，幾兄弟開始嘗試覓舖，找到火炭一個工廠大廈單位。舊有的機器，許多「一搬親係用唔返」，空氣淨化系統等又要重新設置，連同重置凍房和各種機器，大概要投資 2,000 多萬元。
「好彩當時冇落訂。」公布收購價後，幾兄弟商量過，還是覺得這項投資回報率年期太長、風險也太大：「成 60 歲人，仲走去再重新嚟過起步，再投資成 2,000 萬一門生意，當我哋可以捱到 70 歲，你話嗰 2,000 萬依十年可唔可以回得返嚟吖？真係睇唔到個前景。」
原本如留在原舖，成哥打算做到讓曾學過幾年的兒子接手，但要大額投資轉到新環境，他們對前景也沒有信心。想到將來要為尾數「找數」的也是這些子侄，不如索性光榮結業：「唔好畀咁大壓力啲後生仔好過啦，你夾硬嚟，吃力不討好。」
不設工場的「回遷」邀請
與啟華魚蛋同位於南角道、有逾 70 年歷史的源茂興記茶莊，同樣選擇光榮結業。市建局沒有邀請源茂興記茶莊回遷，不過就曾與啟華魚蛋接觸。成哥說，市建局曾表示可提供單位讓他們回遷，但表明只能做零售，意味本來自設魚蛋工場的他們，要另覓工場、再運返回遷店舖售賣。
「你話好唔好笑吖？係咪傻吖？⋯所以我哋都費事睬佢，直情都唔諗佢」，成哥冷笑。他說由入行到今時今日，啟華由始至終也主要做批發生意，供貨予車仔麵檔和小食店；至於零售生意「都唔知道有冇一成」，多數也是舊街坊或客戶專誠開車來買，「佢哋話第二度食唔返」。
店舖所持是食物製造廠牌照，成哥說曾問市建局職員，「你唔畀工場我，要我售賣，我做咩呀？我都擺唔到機器、做唔到魚蛋，你叫我賣乜嘢呀？」對方無法回應，只說會為他們安排，最後也不了了之。「你收我舖，你都知我牌照係咩牌照啦，啱唔啱呀？所以嚟講，市建局做啲嘢，就各有各做，每一個人個部門唔知第二個人做緊乜嘢」，成哥大感無奈。
反對無效
教成哥感不滿的，還有市建局的收購價。2022 年 5 月人口凍結時，樓市仍然高漲，但其後樓價持續下跌，市建局至 2023 年 9 月刊憲後，再相隔七個月才於 2024 年 4 月公布收購價，教成哥大失預算。他也不滿，市建局稱因衙前塱道商舖人流較多，故該條街每呎收購價比南角道的高出 2,000 多元。「買餸梗係人多啦，夜晚去行，睇吓多唔多？」成哥說來仍然有氣。
成哥續說起，2019 年曾有地產商想收購啟華的舖頭，出價 3,200 多萬元，「我哋諗住自己做生意，點解要賣舖啫？兼夾係祖業，梗係唔賣畀佢、由得佢啦」，怎知數年後，市建局來收購，出價 2,600 萬，這次他們沒有選擇，只能「焗賣」。「你話吖，地產商出咁嘅價錢，我哋都有權唔賣呀！你市建仲出低過佢，一定要賣畀佢，你話幾無奈呀，真係斷搶㗎！」他激動地敲了敲桌。
不滿收購價過低，他也曾經和街坊去遊行請願，到過市建局和政府總部，但政府稱市建局不屬政府部門，無權影響其內部決策。成哥不忿：「政府話市建局唔係佢嘅部門，但你就畀個市建咁大嘅權力，我哋做市民反對都無效」，「你政府又可以幫佢手畀佢發展，要賣地畀佢哋、要畀地佢徵收土地？𠵱家叫強搶呀！」
去年 10 月，一眾街坊曾在群組商議行動，於龍崗道、南角道、衙前圍道一帶貼標語和掛橫額，抗議市建局出價過低、強搶民資。不過晚上貼完，翌日中午便有市建局職員來撕，食環署人員亦上前勸喻，指是煽動民情、可用《國安法》拘捕，「如果你唔摵有機會畀人告㗎」，警察也前來拍照。「咁我哋見到咁樣嘅情形，自己搣囉⋯⋯無必要呀。」
冷清的街道、失業的「街坊保長」
決定結業後，啟華一直供貨的 70 多間食店，不少也嘆可惜，問可以去哪找到類似來貨。「你話要一模一樣嘅貸色，就一定係冇㗎喇，類似嘅就一定有嘅。」成哥有信心地說，店舖所製魚蛋，至少八成為魚肉、不足兩成為調味料和粉，真材實料，在香港買少見少。
最近十多二十年，店舖生意減少，早上起貨、送貨後，下午便開始清閒，成哥便坐在店舖外，與路過的街坊「打牙骹」、約朋友打麻將消磨時間。訪問期間，每個路過的人都幾乎認識成哥，與他說上兩句，「啲街坊叫我做街坊保長，有咩事搵阿保長啦！」成哥自豪地笑了。「條街有咩事呢，就多數經過我，搵邊個邊個，『喂見唔見呀邊個，你見到同佢講聲我搵佢吖！』」
但隨重建展開，這街坊保長大概也要「失業」。「以前好熱鬧㗎，行過又傾兩句說話、打吓招呼，好多街坊喺度，個感覺係好好、好舒服。但𠵱家坐喺度呢，坐咁耐都係一個街坊咋⋯⋯好悶呀，冇晒嗰個氣氛。」成哥說，今年初開始，附近住客和商舖陸續遷出，至七、八月，整條南角道只餘約五間店有營業，「就更加感覺得到，條街好冷清。」
無法重現的街坊情誼
成哥的住所是重建範圍之一，他曾嘗試尋覓同區單位，但始終不合意，將與貓狗一同搬往大埔村屋。「唔住嘍，九龍城畀我嘅感覺，已經係冇晒㗎喇，啲舊街坊冇晒、啲人情味都冇埋，覺得冇咩好留戀」，他語氣盡是唏噓。「都唔想留返喺九龍城⋯點解呢，九龍城畀你嘅感覺，已經係兩回事、兩個天地。」
自 20 歲到啟華魚蛋工作、搬來九龍城，一住就是 40 年，成哥最不捨的就是這裡的回憶。「呢柞街坊，四十幾五十年，真係個感覺，係好似係兄弟姊妹咁。」明明沒有血緣關係，但有街坊家裡煲湯，會特意下樓盛一碗給他喝；看着街坊的子女結婚生子、孫兒也讀完中學，就如看到自己的子女一樣。「依個感覺呢，係積聚落嚟，唔係一時一日咁。」
將來街道兩旁建成住宅大樓、新式商舖，「冇㗎喇，一定冇𠵱個感覺」。「冇㗎，積聚咗幾十年，大家嗰個感覺、嗰個友誼，喺邊度都攞唔返。再搬去第二區，有冇話四十年？冇㗎喇。人嚟講，好話唔好聽，𠵱個四十年，已經叫做好夠㗎喇。」
喜欢我的作品吗？别忘了给予支持与赞赏，让我知道在创作的路上有你陪伴，一起延续这份热忱！
- 来自作者
- 相关推荐