一念無明

細個返咗十二年教會學校，難免內化咗一定嘅價值觀。中學四社叫做「智勇忠誠」，校訓係「悅樂主心」，當年仲有同學自稱「君子」（大家都係當佢講笑，唔知當事人仲記唔記得自己咁講過 XD）

成長路上，又有一啲關口令世界觀崩塌。如果自由意志係絕對嘅話，係咪即係自己想做咩就做咩？再經歷多一啲又好似唔係，講到尾，或多或少都會顧慮人哋點睇。

本來無一物，但人經過規訓，又會自動自覺執行「社會」嘅期望。

當然，傅柯冇提到呢種所謂「現代」、唔流血嘅權力運行，喺當年主要適用於西方國家。同一班講「文明」嘅管治者，同一時間喺殖民地繼續暴力鎮壓反抗嘅大有人在。環形監獄令到囚犯作繭自縳，成為管治機器一部分，但始終都係有幾隻出頭鳥要用槍打。

講遠咗。

假設一切隨心，何處惹塵埃？