47人案．獲釋｜記岺子杰出獄首天　在市民和「唔係普通市民」身份中探索

6 月 13 日

「當我唔接受訪問都係一件事嘅時候，我不如盡量講，我覺得仲可以講嘅說話」。

文｜集誌社記者

岑子杰踏入沙田瀝源邨，這個他熟悉的社區，這位數小時前還身陷囹圄的政治人物，即重拾老街坊落樓吃便飯的隨性和輕鬆。岑子杰捧起麥芽花外賣杯，穿着純黑色背心，一邊㗳着茶記的齋啡，一邊從容地回答傳媒提問。 
訪問過程中，不時有路過街坊向他揮手，岑頓時面露笑意、熱情地：「Hello Hello」，細心的他，不忘拜托正在拍攝的記者，「小心唔好影到啲街坊，尤其而家呢個時勢」。
他深知時勢不同了，卻在恢復自由身的首半日，多次見傳媒，高調落區。他認為，這是一份責任。「當我唔接受訪問都係一件事嘅時候，我不如盡量講啲我覺得仲可以講嘅說話」。
被囚四年多，岑子杰左腳踏出監獄，右腳便重踏服務過的瀝源，一切卻物是人非；曾經的區議員、曾經的民陣召集人、曾經的社民連副主席，如今卸下職責、再沒有了過去的一些身份。被問到，今日是抱着什麼身份自處？他聳一聳肩，「普通市民囉」，那麼感覺自在嗎？他言簡意賅，「摸索緊」…… 。

記掛社區瑣碎事　「一份情意結，令我想返嚟」

因為一份「未完成嘅責任」，岑子杰清晨出獄，陪伴家人數小時後，便換上一套輕裝，重返當年做區議員、服務兩年直至入獄前一天的社區 —— 沙田瀝源邨。

未完成的事有很多，他盡皆如數家珍，如這區的隔音屏障、擴闊橋面、鳳凰木的樹枝修剪、電梯工程進度。但其實他深明，無論再耿耿於懷，遺憾亦難以做到什麼，「我知𠵱家返黎唔會完成到呢啲責任，但就係一份情意結，令我想返嚟」。

要對真正地連結和深入認識一個社區，需下苦工。岑子杰憶述，「人生第一份工就是議員助理，明白到做區議員唔係打份工咁簡單，要認識呢個社區。」他在任議員的兩年間，上班下班會選擇不同的路徑，每都盡量以腳步逛完整個選區，親身感受和了解社區。

重遊昔日區議員路線

記者跟着他，重遊當年他放工的必經路線。從議員辦事處走到沙田站，最快路徑不過10分鐘的腳程，他卻兜了大圈，從瀝源出發，經過豐和邨，到達上禾輋，路經排頭村，行了近半小時。

途中，他細心觀察，問題多多；走幾步，便停頓片刻，向隨行的街坊友人發問：「呢橦樓係維修係剪樹枝定髹緊油？」、「呢個遊樂場係新建嘅設施？幾時起㗎？」、「呢個平台以前好多老鼠𠵱家仲有無？」

「區議員要處理嘅，其實係成個選區最瑣碎嘅事，所以好考驗我嘅敏感度」。近半小時的路程，岑子杰東張西望，時而留意路邊雜草生長情況、時而查看垃圾有否堆積、時而注視渠口有沒有否堵塞或惹蚊。他說，這些瑣碎事，就是他在往昔，每天透過走路，在選區察看的事。

「已經同呢度連結成一種關係」

令岑心繫於此的，可不只社區的種種硬件設施，更是一份温暖、一份情——「人同人之間的連結、信任和關心」。他多番強調，今次回來不是巡區，亦非因職責、非因他是區議員，非因有偉大理想，要繼續為市民發聲等；單純因為他「已經同呢度連結成一種關係，呢個地方從此亦成為左的人生嘅一部分」。

當他說起回來短短數小時，遇到不少街坊向他傾訴，見到認識的小學生開始升中學、中學生開始揀科、升大學的時候，臉上便泛起滿足的微笑。

說起這裏的街坊和朋友，他頓時感性起來，由衷地感激身邊這些身邊熟悉的人，令他覺得不是自己一個人走這條路，「尤其是我啱啱出到嚟來，對個社會仲好陌生，見到呢啲熟悉的人，令我覺得踏實」。

在「市民」和「唔係普通市民」的身份中探索

放下種種職責，被問到，今日是抱着什麼身份自處？他聳一聳肩，回答「普通市民囉」。那麼感覺自在嗎？他言簡意賅：「摸索緊」。

說着說着，他略有保留，給出一個較肯定的答案「我𠵱家嘅角色，係一個市民，但係毫無疑問，又唔係一個普通市民」，他續解釋：「如果求其一個人放監，你唔會關注，你（記者）依家追住我，社會好明顯俾左個角色我」。

角色往往生成責任，因這份責任，他願在出獄後公開見傳媒、發言、落區。他輕言道：「當我唔接受訪問都係一件事嘅時候，我不如盡量講，我覺得仲可以講嘅說話」。

陳皓桓：他還是那位本性難移的岑子杰

這種感言，往往叫熟悉他的人憂心，包括他這位社民連兼民陣的戰友——陳皓桓。闊別四年多，兩位首次在鐵欄外重逢，岑子杰率先認到正在公園抽煙的陳皓桓，招呼未打，岑便開玩笑道：「先生，呢度唔比食煙㗎喎」，兩人相視而笑、熱情相擁。

其後，陳不忘調侃道「佢無consent 攬我架…遲啲要開記招，叫佢鞠躬道歉」。玩笑中，盡見二人深厚不變的情誼。

岑子杰捧起麥芽花外賣杯，穿着純黑色背心，一邊㗳着茶記的齋啡，一邊從容地回答傳媒提問。

岑子杰「扑咪」期間，陳皓桓守在他身旁，默默聆聽、等候。陳語氣略帶感慨道：「有返當年同佢喺民陣見記者，我又係企喺佢隔離嘅感覺」，但比起懷念當年，他更是為老友擔心，「𠵱家嘅環境，所有嘢都收得更緊，佢真係第一個被告見記者、仲講咁多嘢… 仲無拿拿話巡區，大家都嚇親，我都嚇親」。

即使如此，他仍然佩服岑的勇氣、敢言、和表達的精準，「Jimmy 就係會諗多啲，喺呢個咁嘅環境，嘗試講下嘢… 試問有幾多人可以做到佢咁，我就覺得自己做不到」。

被問到，四年牢獄之苦令岑有何變化，陳皓桓這樣斷言：「見佢一嘢咁攬住我，就知佢本性難移」。在陳皓桓眼中，岑子杰還是個以人為本的人，無論對街坊、對他們、對記者，還是「好細心、好願意關心人」。

昔日戰友：今日只想簡簡單單食餐飯

午飯時段，在一家60多年歷史的屋邨麵店，岑的友人及社民連成員包括黃浩銘、陳皓桓、阿牛曾健成、陳寶瑩陸續而至，紛紛為岑送上擁抱和祝福，連餐廳老闆及員工亦熱情地與他寒暄。

為岑子杰的回歸既喜且憂的，還有社民連前主席黃浩銘，「看到自己的黨友、朋友、同志出返黎一定係開心，但始終會擔心佢將來點行」。同時，他為監獄裡長毛感到憂心，只盼人人都能平安出來。不過久別重逢，暫放下煩心事，黃淡言：「今日只想簡簡單單食餐飯」。

飯局尾聲，杯盤狼藉，岑子杰向記者「炫耀」着友人送給他的禮物，有一隻史迪仔毛公仔，他跳皮地笑說：「佢哋係為咗俾我睇史迪仔（最新上映電影）先放我出嚟」；還有一件彩虹宇宙恐龍刺繡的別針，他珍而重之，馬上把它們都掛在背囊上。

此時，友人捧上一個大蛋糕，朱古力牌寫上「Welcome Back」，岑略帶靦腆，不知所措，三推四請，才坐在蛋糕前，與街坊送上的花束合照。陳皓桓打趣道，「好似慶祝母親節咁」，引得哄堂大笑，打破了尷尬。其後，岑鬼馬地向記者透露，蛋糕是自己托友人買的，為預祝一位街坊朋友明天的生日，「唔知做乜寫左Welcome Back」。