五日書｜非常時期

陌生感總係對我有種吸引力。無論係瞓醒後腦海殘留嘅夢境，定係旅行嗰陣喺一個唔熟悉嘅地方起身，都好似打開咗個可以進入異度空間嘅傳送門。

有時又會調返轉。過咗嚟愛沙尼亞八、九個月，宿舍望出去嘅風景照計已經係睇慣晒嘅日常，但係有時發完個覺得仲喺香港（甚至仲讀緊中學）嘅夢，清醒時見到嘅嘢好似比夢境仲如幻似真。

內心有一部分覺得，自從唔再同呀媽一齊住之後，搬出去住咗兩年嘅單位、臨走前嘅過渡、依加住嘅學校宿舍都係暫時、唔安定嘅，急不及待想快啲就搵一個真係住得舒服嘅地方安頓落嚟。

另一部分又覺得其實自己都係坐唔定，會唔會無論如何，過兩三年又想再搬呢？理論上「臨時」係相對於「永久」嘅概念。如果我命中注定係要到處飄泊，會唔會所謂安定嘅時間先係少數嘅例外呢？