小舌輔音由「五胡」傳入漢語改變咗《切韻》「牙、喉」聲母

聲母【群】非三等韻由/g/衰變成/ʁ/輔音

由隋朝《切韻》啟發嘅中古漢語音韻體系當中，某啲屬於聲母【匣】嘅漢字雖然喺漢語、韓國🇰🇷、越南🇻🇳會讀成喉摩擦輔音/h/聲母之類，但喺閩語白話音就讀成軟腭破裂輔音/k/聲母之類（杜佳倫2013年）；引用梅祖麟2015年提及嘅例子，佛教用語आगम（āgama）傳華之後音譯成【阿含】，雖然漢字「含」（《切韻》【匣】母）喺普通話讀ㄏㄢˊ（拼音hán）唔符合佛教原本嘅軟腭破裂輔音/ɡ/聲母，但係用閩語白話音讀成/k/之類（由/ɡ/清化而成）就會吻合返佛教原文。另外根據中古漢語音韻學著作《韻鏡》之類嘅【等呼】概念，屬於聲母【群】（推定中古音/ɡ/）嘅漢字音就只有三等韻，消失咗嘅【群】母一、二、四等漢字有無可能好似上述例子咁，隱藏咗喺嗰啲閩語白話音讀成/k/嘅【匣】母字入面？

引用polyhedron提出嘅主張，漢語「牙、喉」聲母當中（見、溪、群、疑、曉、匣、云），應該存在三等韻讀軟腭輔音（例如/k/），非三等就改讀小舌輔音（例如/q/）嘅可能性；哩種類似突厥語系嗰套軟腭輔音配「前元音」（包括咗《切韻》三等韻）、小舌輔音配「後元音」（唔包括《切韻》三等韻）嘅讀法，當一個軟腭破裂濁輔音/ɡ/（相當於【群】母）配搭「後元音」而要改讀小舌破裂濁輔音/ɢ/，就好容易衰變成小舌摩擦濁輔音/ʁ/（突厥語系可以寫成ğ避免混淆字母g），結果/ʁ/字音併入咗去《切韻》【匣】母。

翻查史書記載匈奴南北分裂之後【東漢】拉攏胡人合作，導致塞外胡人相繼內遷中原成為東漢、魏晉嘅臣民甚至權貴（例如【蜀漢】將領馬超就有外族背景），結果公元311年匈奴【漢趙】政權攻陷華夏【西晉】皇都洛陽開啟【五胡十六國】時代（漢人政權流亡江左建立【東晉】）。假如蒙古草原當年已經存在某種形式嘅上古時代突厥語言（或者類似突厥嘅阿爾泰諸語言），咁就相當於【西晉】滅亡之前華北有過百年時間胡漢語言雜居，提供環境畀【群】母（軟腭破裂音/ɡ/）嘅非三等改讀小舌破裂音/ɢ/之後再衰變成小舌擦音/ʁ/而併入咗去《切韻》【匣】母；至於江左（六朝首都【建康】周邊地區）因為遠離蒙古草原而好少受到「五胡口音」影響，所以漢人【衣冠南渡】之前嘅「江左口音」有機會殘留喺閩語白話音入面（梅祖麟2015年），令到閩語白話嘅【群】母非三等可以維持/ɢ/而無衰變成/ʁ/（又或者根本無發生過【群】非三等要由/ɡ/改讀成/ɢ/），結果某部分《切韻》【匣】母嘅漢字喺閩語就有可能讀成/k/聲母之類（由/ɡ/清化而成）。

「匣三」唔可以由/ʁ/改讀成/ɡ/而發展出【云】母

清末民初學者曾運乾發表過著名嘅【喻三歸匣】理論，即係聲母【云】（守溫【喻】母三等韻）嘅漢字喺古代本來屬於【匣】母其中一部分；因為《韻鏡》之類記載【匣】母只有一、二、四等韻，換言之【匣】母好可能原本有齊一至四等，後來三等韻脫離出去變成【云】母。前文提及到【群】非三等因為「五胡口音」由/ɡ/改讀成/ʁ/之後併入咗去《切韻》【匣】母，但係【匣】母本來已經存在自己原有嘅漢字（可能係喉摩擦濁輔音/ɦ/）；假設「五胡口音」人士繼續沿用類似突厥語系嘅ɡ、ʁ交替法則，如果佢哋講漢語嗰陣【匣】母三等韻因為配搭「前元音」就要改讀成/ɡ/嘅話，豈不是又會同讀/ɡ/嘅【群】母發生衝突？

結果解決方法可以係「五胡口音」順應漢語將【匣】母三等韻（《切韻》【云】母）改讀成軟腭摩擦濁輔音/ɣ/（漢人未必會細分ɦ、ʁ、ɣ），例如漢字「雄」（開口【云】母）喺香港粵語讀hung4（濁聲母清化）；另一種可能性係由摩擦輔音再衰變成⦰（零聲母），例如「炎」字（云開）轉咗⦰之後由介母ㄧ（普通話拼音i）補上去作為頭音讀成ㄧㄢˊ（拼音yán），即係半元音/i/轉成相對應嘅半輔音/j/。至於合口【云】母就以漢字「永」為例，「永」字嘅日本🇯🇵【漢音】係ヱイ（weĩ），喺香港粵語就讀成wing5，反映「永」字應該都係衰變成⦰之後，由雙重元音/ui/嘅介母補上去作為頭音（半元音/u/轉成相對應嘅半輔音/w/）；而普通話將「永」字讀成ㄩㄥˇ（拼音yǒng），就代表介母由/ui/換位變成另一種雙重元音嘅/iu/（後面嘅/u/結合ㄥ變成ong）。

自從「云合」開始改讀⦰之後，影響到少部分【匣】母嘅漢字音都有可能衰變成⦰，例如「和」字嘅日本🇯🇵【吳音】係ワ（wa），喺香港粵語就讀成wo4，代表「和」字衰變成⦰之後介母補上去作為頭音；參考返向筱路2026年論文，分析公元5世紀所採用嘅佛經音譯漢字，反映咗《切韻》【匣】母字喺當時分成ɡ、h、⦰（零聲母）3種讀法，吻合前文提及漢字音受到「五胡口音」影響由ɡ衰變成h之後繼續鏈變而發展出⦰嘅推論。

參考、鳴謝：杜佳倫【閩語古全濁聲類的層次分析】（2013年）；梅祖麟【試釋《顏氏家訓》裡的「南染吳越，北雜夷虜」──兼論現代閩語的來源】（2015年）；polyhedron【論中古漢語見組一、二、四等字聲母爲小舌音】；向筱路【五世紀河西漢語的聲母系統──以北涼曇無讖譯經對音為中心】（2026年）；張敏「博弈論、演化論與漢語句法的接觸語言學研究」講座（2020年）、張敏「漢語在世界語言中的獨特性：從地理環境及氣候變遷看其成因」講座（2014年）；【字統网】；BYVoid【韻典網】等等