南丫海難13年・專訪1｜遺屬梁淑玲：「理論上香港人係唔應該記住呢單嘢」

（原文刊載於法庭線）

「我叫 Alice，我細佬係梁家杰⋯⋯」訪問剛開始，Alice 讀出弟弟的名字，眼淚已奪眶而出：「十幾年前，佢係一個 23 歲嘅少年。」
2012 年 10 月 1 日晚上，家杰與另外 38 名乘客在海難中葬身大海。那一年，他剛於港大畢業，在港燈任職見習工程師兩個多月。被尋獲時，身邊還留著學聯會員證，以及一張 Neway K-Fun 卡。
在姊姊眼中，弟弟勤奮上進、關心社會。「我諗佢都冇諗過，踏出社會唔夠 3 個月就走咗⋯⋯」
令她更意想不到的是，追尋真相之路困難重重，「冇諗過走咗 13 年，到今時今日先開死因庭，冇諗過要開死因庭，先知道真相，亦冇諗過原來開死因庭，係咁困難。」
海難令家庭遭逢巨變，連這位慣於主持大局的大家姐，也一度手足無措。由事發當刻如何安撫父母、往後如何面對節慶、以至家裡該否擺放弟弟的照片，都變成一場又一場戰役。
「我知道我爸爸有一年幾嘅時間，佢飲茶係會開多個茶位⋯⋯」Alice 哽咽道：「其實大家要適應呢啲嘢，係需要好長時間。」
如今，她只寄盼研訊結束後，能走到弟弟墳前，告訴他：「件事解決咗喇。」讓弟弟安息。「我肯定佢有嚟聽審，佢都知道成件事有幾荒謬。」

一道傷痕

Alice 一家有四兄弟姊妹，她是長女，除家杰外還有兩名妹妹。家杰修讀碩士後加入港燈，不時與家人分享工作點滴，每日乘船上班、發電廠設有飯堂，對他而言都是新鮮事。

「佢入咗港燈好開心⋯⋯佢對好多嘢都好感興趣，當然佢喺入面都有好多朋友」Alice 說。

事發當天下午，一家人到酒樓用膳，席間談及港燈邀請員工晚上觀賞煙花，家人還說笑：「有位都唔益我哋。」弟弟靦腆回應：「我都唔知㗎，下次啦」。

晚上，客廳電視突然插播海難新聞，一家立即用盡各種方法聯絡弟弟，但都沒有回音。Alice 與父親動身往海怡半島岸邊尋人，眼前一片漆黑，只見搜救員不停把傷者救出海面，「一直好期望嗰個係佢，結果都見唔到。」

他們轉到各大醫院尋人，依然一無所獲，無奈回家。「返到屋企係另一個戰役，因為要面對媽咪⋯⋯返到屋企，我媽咪同我妹望住我哋返嚟，我唔講任何嘢，都知發生咩事。各自各喊啦，我都唔知講咩。」

作為大家姐，家中遇到任何問題，Alice 習慣指揮大局，但當刻她也不知如何是好，「我都唔知叫佢哋做乜好⋯⋯我可以做嘅，就係攬住大家喊。」翌日，Alice 獲告知「黃巴士嚟緊」，意識到「哦、（弟弟）走咗喇」，並由她負責認領遺體。

兩姊弟再相見，弟弟躺在殮房，臉上多了一道疤痕。

未圓之夢

「佢係一個好乖、好勤力、好孝順嘅男仔⋯⋯」Alice 記得，弟弟在大學時活躍於不同學會，不但關顧師弟，亦關心社會，「以前回歸嗰啲日子，佢都會去遊行，佢好關心香港，亦好關心身邊嘅人。」

「佢實在太好，佢好到一個點，係我搵唔到缺點，我有時諗點解，死嗰個點解唔係我⋯⋯可能成件事會簡單啲，佢係一個唔應該死嘅人。」

Alice 又記得，弟弟曾跟她訴說對未來的憧憬，希望結婚成家、升職，又曾問姊姊自己應否修讀博士學位，抑或早點投身社會。

「呢個位我都糾結咗好耐⋯⋯我同佢講，不如你出嚟做下嘢先啦，話唔定你對博士學位冇興趣呢，話唔定你之後想讀其他嘢呢。」

弟弟最後獲港燈聘用，由入職到遇難，不足 3 個月。

噩耗突如其來，當年才二十多歲的 Alice 背起辦後事的重擔，尋找靈位、安排出殯、出海招魂。出殯當天，靈堂坐滿前來送別弟弟的親友。

「我係呆咗，我冇諗過原來有咁多人送佢上山，原來我要搵兩部 60 座（旅遊巴）先夠⋯⋯我覺得呢個係反映咗佢喺呢個世界廿幾年，佢做過嘅事有幾多人知道。」

家庭巨變

弟弟驟然離世，一家人的生活翻天覆地。初時，當外人問起弟弟，父母會稱弟弟在外國讀書、含糊帶過。多年來經常光顧同一家街坊酒樓，相熟的侍應、茶客不知就裡，隨口問起父母：「好耐冇見過你哋個仔」，都會觸碰到傷痛。

「我知道我爸爸有一年幾嘅時間，佢飲茶會開多個茶位，我都冇出聲，其實大家要適應呢啲嘢，係需要好長時間⋯⋯」Alice 哽咽道。

最難過的「戰役」，莫過於大時大節，一家人圍在一起吃團年飯、派利是，「跟住你就發覺少咗個人」，大家都有默契地避談弟弟。

在弟弟過身不久，母親試過一夜間把兒子的相片全部收起，Alice 三姊妹為此與母親爭執，「我哋嗰時立場係，佢仲喺度嘅，如果佢喺屋企見唔到自己嗰張相，佢會唔會以為我哋已經唔想理佢呢，忘記佢呢。」

後來有親戚勸說，「其實媽咪係好辛苦嘅，喺屋企睇住佢張相。」母親又曾多次凌晨走入弟弟房間痛哭。

「突然之間『叮』一聲，我明喇，由佢啦⋯⋯其實我媽媽係暫時接受唔到。」

理解母親的感受，三姊妹亦不再堅持，半年後，一家決定搬屋。直至近年，Alice 喜見弟弟的照片重見天日，「依家見到張相出返嚟，係開心嘅，要經歷好多嘢，先走到今日。」

走上前排

另一場艱苦戰役，是 Alice 十多年來堅持追尋弟弟罹難的始末。她忘不了弟弟面上那道傷疤，「我相信我細佬唔係船嘅正面撞擊，會唔會係座椅？天花？」她反覆追問。

海難發生後，政府成立獨立調查委員會，運輸及房屋局亦對海事處進行內部調查，「我哋好 appreciate（感激）⋯⋯希望畀到個公義我哋。」

然而，這一份堅持，年長一輩未必理解。

「老人家世界裡面，人死咗，唔知做嚟做咩。但我哋後生呢輩，喺我心入面，我係想知㗎，又或者咁講，我代佢知，因為我諗佢喺嗰一瞬間⋯⋯都冇諗過踏足社會未夠 3 個月就走咗。」

運房局的內部調查報告，最後在 2014 年只公布摘要，指出 17 名海事處人員涉行為不當，基於私隱不公開身分及職級。時任局長張炳良曾表明報告「不可能不公開」，但至 2025 年，報告仍未完整公開。

事發後數年，Alice 都保持沉默，靜候政府交代，直至 2020 年 11 月，水警通知已完成調查，律政司不會再有檢控，死因裁判官同月決定毋須召開研訊，令 Alice 希望徹底幻滅。

「點解開一個死因庭都會咁難，其實係咪我哋好浪費納稅人嘅錢？嗰 39 條人命係咪唔重要？其實佢哋嘅死，係牽連到全香港市民嘅性命同安全。」

以往家屬召開記者會，Alice 為免影響父母，只會坐後排、不會發言。這一次重擊，將她推向前排，決意為弟弟公開發聲。

迎難而上

近年，Alice 成為少數仍願意公開受訪的海難家屬代表。在法院外、記者會上面對鎂光燈，Alice 總能有條不紊地訴說家屬訴求，眼神堅定、情理兼備。願意站出來，亦因為看見部分家屬年邁疲憊，「始終要有人行落去」。

2022 年，她與另外兩位家屬趙炳全、徐志盛，入稟高等法院要求召開死因研訊，一度被駁回、再上訴，最終成為首宗以公眾利益為基礎，成功爭取召開死因研訊的上訴案。而他們上訴所依賴的理據，正是 Alice 於 2021 年向法庭申請，取得警方呈交死因庭、有關弟弟的死亡調查報告。

Alice 當日捧著文件離開西九龍裁判法院，在路旁揭開紙箱，望見第一頁紙就崩潰落淚。

「原來 2,000 頁紙係好 heavy（沉重）⋯⋯我記得我打開份嘢嘅第一版，睇唔落去⋯⋯太辛苦，佢個名我讀出嚟已經有困難，我想像唔到點樣可以去睇。」

最後，她把文件交由記者和律師拆解，尋得蛛絲馬跡，在困局中找到轉機。勝訴那天，Alice 在法院外受訪，感慨指「咁多年唯一一次可以喺鏡頭前笑。」一路走來，她靠著與弟弟的連繫，亦感激另外兩位家屬「戰友」，一同迎難而上。

「如果身邊冇一個咁身同感受嘅人，係好難做到。」

還原拼圖 

得來不易的死因研訊，於 2025 年 5 月展開，Alice 與妹妹一有空便到庭旁聽。

某日，研訊主任在庭上讀出每位死者的死亡情況。其中一名搜救警員的供詞提到，「本人於船中間坐椅發現一名身體已僵硬之男性，之後通知潛伴把他帶回水面⋯⋯認出照片內之男士正是當天本人在船艙內尋獲之男士」。

庭上隨後確認，該名男子正是梁家杰。

Alice 與妹妹坐在近親席上，眼淚不自覺湧出，這是她們 13 年來，首度得知弟弟被尋獲的實際位置。「佢讀出嚟，我都已經喺度喊。」Alice 說。

每一次到庭、每一次憶起逝者，對家屬而言有如被撕開瘡疤。

「呢 13 年對我嚟講係一個折磨⋯⋯但我覺得，呢個係我唯一可以再繼續幫佢做嘅嘢。」

Alice 過去一直以「還原拼圖」形容死因研訊，無奈事隔多年才召開，當中有證人已離世、年老患病或移民，未有出庭作供。

「其實你問我，死因庭一早就要開，根本係有百利而無一害⋯⋯Puzzle（拼圖）1,000 塊，你話係咪砌到 1,000 塊，我一早已經話一定冇，但哪怕只係 200 塊，我都想官員話畀人知，嗰 200 塊牽涉啲乜嘢，起碼畀人知道，原來當中有咁多失誤。」

當一切結束，她盼望能走到弟弟墳前，跟他說事情已解決，希望弟弟能安息。

「我希望同佢講下份判詞，佢一直都知道，我肯定佢有嚟聽審，佢都知道成件事有幾荒謬。」她補充一句：「可以嘅話，我都想睇下政府會唔會有下一步嘅行動。」

問她想香港人如何記著這場海難，她斬釘截鐵地說，若海事處及各持分者承認問題、承諾改善，「理論上，香港人係唔應該記住呢單嘢。」

「我唔需要大家記得呢個世界有梁家杰，因為佢已經死咗，但我會想大家知道佢哋呢 39 條人命，係換嚟大家 move on（向前行），良好嘅 move on，改善咗嘅 move on，改善咗嘅香港。」

記者：WWY 

法庭線官網
法庭線Facebook
法庭線Youtube
法庭線Instagram
法庭線Patreon